رونالدۋ «يۋۆەنتۋستاعى» قارجىلىق قۋلىققا قاتىسى بار دەگەن كۇدىككە ىلىكتى

پورتۋگاليانىڭ اتاقتى فۋتبولشىسى كريشتيانۋ رونالدۋدىڭ باسى داۋدان ارىلار ەمەس. الەم چەمپيوناتىنىڭ الدىندا «مانچەستەر يۋنايتەدتەن» كەتكەننەن كەيىن ونىڭ كاتاردا دا جولى بولمادى. ەندى ول قارجىلىق ايلا-شارعىعا قاتىسى بار دەپ ايىپتالىپ جاتىر.

«سپورت ەكسپرەسس» باسىلىمىنىڭ حابارلاۋىنشا، كريشتيانۋ رونالدۋ مەن «يۋۆەنتۋس» كلۋبىنىڭ باسشىلارى اراسىنداعى جاسىرىن كەلىسىمدى باق وكىلدەرى ءبىلىپ قويعان. قازىر تۋريندىك كوماندانىڭ باسىنا بۇلت ءۇيىرىلدى. كلۋبتىڭ پرەزيدەنتى اندرەا انەللي مەن ۆيتسە-پرەزيدەنت پاۆەل نەدۆەد جانە ديرەكتورلار كەڭەسىنىڭ باسقا دا مۇشەلەرى تولىق وتستاۆكاعا كەتكەن. بۇعان كلۋبتاعى قارجىلىق ايلا-شارعىلاردىڭ كوپشىلىككە بەلگىلى بولۋى باستى سەبەپ بولىپ وتىر.

«يۋۆەنتۋس» باسشىلارى فۋتبولشىلاردىڭ ترانسفەرىنە قاتىستى سومانى تومەندەتىپ، قىزمەتكەرلەردىڭ جالاقىسى مەن شتات شىعىندارى تۋرالى مالىمەتتى ازايتقان.

قازان ايىندا La Gazzetta dello Sport گازەتىنىڭ ءجۋرناليسى فابيانا دەللا ۆاللە پورتۋگاليالىق فۋتبولشىنىڭ دا بۇل ىسكە قاتىسى بار ەكەنىن ايتقان. ناقتى ايتقاندا، تۋريندىك كلۋب باسشىلىعى رونالدۋ تولەگەن 20 ملن ەۋرو كولەمىندەگى سالىقتى ەسەپكە الماعان.

2018-2020 جىلدار ارالىعىندا «يۋۆەنتۋس» 115 ملن ەۋرونى وسىلاي جاسىرىپ قالدى دەگەن كۇدىككە ءىلىندى. سونداي-اق «يۋۆەنتۋس» اگەنتتىكتەرگە جالعان قۇجات ازىرلەپ، وعان كريشتيانۋ قول قويدى دەگەن مالىمەت تە بار.

تۋرين پروكۋراتۋراسى سول كەزدە-اق رونالدۋدان جالاقىسىن كورسەتۋدى سۇراعان بولاتىن. ال ول ەڭبەكاقىسىن جاريالاۋدان باس تارتتى.

داستان كەنجالين،

استانا