Pele ómirden ótti

Brazılııanyń ataqty fýtbolshysy Pele 82 jasynda ómirden ótti.

Pele 1940 jyldyń 23 qazan kúni týǵan. Onyń shyn aty-jóni — Edson Arantes dý Nasımentý boldy.

Ol — úsh márte álem chempıony ataǵyn jeńip alǵan jalǵyz fýtbolshy.

Ataqty fýtbolshy uzaq ýaqyt boıy onkologııamen kúresip keldi. Bul aýrý onyń aǵzasynan 2021 jyldyń kúzinde anyqtalǵan.

Qaterli dertke qarsy kúres maqsatynda birneshe márte hımıoterapııadan ótti. Keıinnen densaýlyǵy oǵan qarsy turýǵa qaýqarsyzdyq tanytty.

Pele bıylǵy jyldyń 29 qarashasynda aýrýhanaǵa jatqyzyldy.

Emdeýdiń birneshe kýrsyn qabyldaǵan edi. Degenmen aqparat quraldary onyń densaýlyǵy kún saıyn nasharlaı túskenin habarlady.

Ol fýtboldaǵy alǵashqy qadamyn 1956 jyly Brazılııanyń «Santos» komandasynda bastap, onda 1974 jylǵa deıin dop tepti.

Al 1975-1977 jyldarda AQSh-tyń «Nıý-Iork Kosmos» klýbynda oınady. Eki komanda sapynda 560 kezdesýde qarsylastar qaqpasyn 541 márte dál kózdedi.

Al Brazılııa ulttyq quramasy sapynda 1957-1971 jyldarda 92 oıynda 77 goldyń avtory atandy.

Dastan KENJALIN,

ASTANA