SportPress.kz قازاقستان سپورت جاڭالىقتارى
«سپورتماستەردىڭ» دەرەكتەر بازاسى قولدى بولدى. سونىڭ سالدارىنان تمد ەلدەرىندە سپورت تاۋارلارىن ساتاتىن دۇكەندەر جەلىسى تۇتىنۋشىلارىنىڭ جەكە دەرەگى جەلىگە تاراپ كەتكەن. ونىڭ ىشىندە 260 مىڭ وتانداسىمىز دا بار.
مەملەكەتتىك تەحنيكالىق قىزمەتىنىڭ مالىمەتىنە قاراعاندا، دۇكەندەر جەلىسىنەن 2012-2018 جىلدار ارالىعىندا تاۋار العان وتانداستارىمىزدىڭ اتى-ءجونى، تۋعان كۇنى، تەلەفون ءنومىرى مەن ەلەكتروندى پوشتاسى جالپاق جۇرتقا جاريا بولعان.
«سپورتماستەر» كومپانياسى دەرەكتەر بازاسىنداعى مالىمەتتەردى مەردىگەرلەردىڭ ءبىرى تاراتىپ جىبەرۋى مۇمكىن دەپ وتىر. الايدا ولار كليەنتتەردىڭ لوگينى مەن ءپارولى، تولەم كارتاسىنا قاتىستى اقپاراتىنا قاۋىپ تونبەگەنىن جەتكىزدى.
قازىر كومپانيا ىشكى تەرگەۋدى باستاعان. كيبەرشابۋىلداردى تالداۋ جانە تەرگەۋ ورتالىعىنىڭ ماماندارى جەكە ازاماتتاردىڭ باسىنا قاتىستى دەربەس دەرەكتەر ءۇشىنشى قولعا ءوتىپ، سونىڭ سالدارىنان كانىگى الاياقتار ارام ويىن جۇزەگە اسىرۋى مۇمكىن دەيدى. سوندىقتان تىزىمدە بار وتانداستارىمىزدى ساق بولىپ، كۇماندى سمس-حابارلاما مەن سىلتەمەنى اشپاۋعا شاقىرادى.
«ەگەر سىزگە «ءبىر ميلليون تەڭگە ۇتىپ الدىڭىز» دەگەندەي فيشينگ حات كەلسە، ول سىلتەمەگە وتپەڭىز نەمەسە ول فايلدى اشپاڭىز. ەگەر سىزگە بانكتەن نەمەسە ىشكى ىستەر ورگاندارىنان بىرەۋ حابارلاسسا، قانداي مالىمەت بەرىپ جاتقانىڭىزعا مۇقيات بولىڭىز.
ويتكەنى وسى مالىمەت كەيىن قولدانىلىپ، بانك شوتتارىڭىزدان اقشا الىنۋى نەمەسە ءسىزدىڭ اتىڭىزدان نەسيە الۋى مۇمكىن. كوبىنەسە الاياقتار قازاقستاندا ەمەس، شەتەلدەردە جۇمىس ىستەپ جاتىر»، — دەدى TSARKA كومپانياسىنىڭ كيبەر-ساياسات جونىندەگى مامانى امىرسەيىت ايتجان ۇلى.
ەركەعالي بەيسەنوۆ،
استانا
