جازعى سپارتاكيادا: ەركىن كۇرەستەن بەلدەسۋلەر اياقتالدى (فوتو)

الماتىدا ەركىن كۇرەستەن VI جازعى قازاقستان سپارتاكياداسىنىڭ قالعان بەس سالماقتاعى چەمپيونى مەن جۇلدەگەرلەرى انىقتالدى.

وسىمەن VI جازعى قازاقستان سپارتاكياداسىندا بالۋاندار باسەكەسى اياقتالدى. بۇعان دەيىن گرەك-ريم جانە ايەلدەر كۇرەسىنەن چەمپيوندار مەن جۇلدەگەرلەر انىقتالعان ەدى. ەندى مىنە، گرەك-ريم كۇرەسىنەن جالپى ەسەپتە شىمكەنت قالاسى توپ جارسا، جەتىسۋ وبلىسى ەكىنشى ورىن الدى. ۇزدىك ۇشتىكتى شىعىس قازاقستان وبلىسىنىڭ بالۋاندارى تۇيىندەدى. ال ايەلدەر اراسىندا الماتى وبلىسىنىڭ بالۋاندارى جالپى ەسەپتە كوش باستادى. ودان كەيىن اقمولا مەن تۇركىستان وبلىسىنىڭ سپورتشىلارى جايعاستى.

ايەلدەر كۇرەسىنەن ۇلتتىق قۇرامانىڭ باس جاتتىقتىرۋشىسى قايرات ساعاديەۆ سپارتاكيادادا بالۋاندار لايىقتى دەڭگەيىندە ونەر كورسەتكەنىن ايتتى.

ۇلتتىق قۇرامانىڭ بارلىق بالۋانى دەرلىك كۇرەستى. تاڭعالدىرعان ەشكىم بولعان جوق. ءبارى ءبىر-ءبىرىن جاقسى بىلەدى. وسىعان دەيىن 53 كەلىدە سىنعا تۇسكەن ەللادا ماحياددينوۆا وليمپيادا باعدارلاماسىنا كىرەتىن 50 كەلىگە اۋىسىپ، بارلىق قارسىلاسىن ايقىن باسىمدىقپەن جەڭىپ شىقتى. ەندى وقۋ-جاتتىعۋ جيىنىن وتكىزىپ، ناۋرىز ايىندا وتەتىن ازيا چەمپيوناتىنا اتتانامىز، — دەدى ول.

ەندى وقىرماننىڭ نازارىنا قالعان بەس سالماقتاعى چەمپيوندار مەن جۇلدەگەرلەردى ۇسىنامىز:

61 كگ:

1.نۇربولات ابدۋاليەۆ (تۇركىستان وبلىسى)

2. ءوسىمجان داستانبەك (الماتى وبلىسى)
3. اسىلجان ەسەنگەلدى (تۇركىستان وبلىسى)، ۆلاديمير كۋدرين (اقمولا وبلىسى)

70 كگ:

1. سانجار دوسجانوۆ (استانا)
2. ەگور انچۋگين (الماتى قالاسى)
3. مەيىرجان اشيروۆ (جامبىل وبلىسى)، دوسجان اسەتوۆ (شقو)

79 كگ:

1. بولات ساقاەۆ (اتىراۋ وبلىسى)

2.نۇرداۋلەت قۋانىشباي (جامبىل وبلىسى)،

3. جىگەر زاكيروۆ (الماتى وبلىسى)، داۋلەت ەرگەش (جامبىل وبلىسى)

92 كگ:

1. ريزابەك ايتمۇحان (الماتى قالاسى)

2.ءابدىماناپ بايگەنجەەۆ (پاۆلودار وبلىسى)

3. نۇرداۋلەت بەكەنوۆ (شقو)، نۇرعالي نۇرعايىپ ۇلى (استانا)

125 كگ:

1. يۋسۋپ باتىرمۇرزاەۆ (اقتوبە وبلىسى)
2. الىشەر ەرعالي (جامبىل وبلىسى)

3.ومار ەيۋبوۆ (الماتى وبلىسى)، تالعات جيەنتاەۆ (قوستاناي وبلىسى)

جالپى ەسەپتە جامبىل وبلىسىنىڭ بالۋاندارى ءبىرىنشى ورىن السا، استانا قالاسىنىڭ سپورتشىلارى ەكىنشى ورىننان كورىندى. ۇزدىك ۇشتىكتى پاۆلودار ءوڭىرىنىڭ ەركىن كۇرەس شەبەرلەرى تۇيىندەدى.

 

شامكەن بايىربەك،

الماتى

فوتو: مادەنيەت جانە سپورت مينيسترلىگىنىڭ سپورتتى دامىتۋ ديرەكتسياسى