قازاقcتاننىڭ ءبىرىنشى راكەتكاسى الەكساندر بۋبليك قاتارىنان 10 رەت جەڭىلدى

تەننيستەن ەلىمىزدىڭ ءبىرىنشى راكەتكاسى الەكساندر بۋبليك حالىقارالىق تۋرنيردە تاعى دا جەڭىلىپ قالدى. ول نيدەرلاندتىڭ روتتەردام قالاسىندا ءوتىپ جاتقان تۋرنيردە ءبىرىنشى اينالىمىنان شىعا الماي، قارسىلاسى — شۆەيتساريالىق ستەن ۆاۆرينكادان 6:7، 4:6 ەسەبىمەن ۇتىلدى.

وسىلايشا، بۋبليك قاتارىنان ونىنشى رەت جەڭىلىپ قالدى. بيىل قازاقستاننىڭ ۇزدىك تەننيسشىسى ءالى بىردە-ءبىر رەت جەڭىسكە جەتكەن جوق. ول سوڭعى رەت بىلتىر  27 قازاندا شۆەيتساريانىڭ  بازەل قالاسىندا وتكەن تۋرنيردە 1/8 فينالدا يسپانيالىق البەرت راموس-ۆينولاستى — 6 :3، 6:3 جەڭگەن ەدى.  سودان كەيىن ءتورت ايدان بەرى جەڭىلىستەن كوز اشپاي،  قارسىلاستارىنا ەسە جىبەرىپ كەلەدى.

مۇنىڭ الدىندا ول فرانتسيانىڭ مونپولە قالاسىندا وتكەن اتر تۋرنيرىندە الاڭ يەسى گرەگۋارا باررەردان 4:6، 7:6(14:12)، 6:7(3:7) ەسەبىمەن جەڭىلىپ، جانكۇيەرلەردىڭ كوزىنشە مىنەز كورسەتىپ، ءبىر راكەتكاسىن كورتتا، تاعى ەكەۋىن الاڭنىڭ سىرتىندا سىندىرىپ تاستاعان بولاتىن. ونىڭ بۇل ارەكەتى جانكۇيەرلەر تاراپىنان سىنعا ۇشىرادى.

بۋبليك دۇنيەجۇزىلىك تەننيس قاۋىمداستىعىنىڭ رەيتينگىندە 50-ورىندا كەلەدى.

داستان كەنجالين،

 استانا