ستراندجا-2023: قازاقستان بوكسشىلارى كەلەسى اينالىمعا شىقتى (ۆيدەو)

بولگاريانىڭ سوفيا قالاسىندا كەشەلى بەرى ءوتىپ جاتقان حالىقارالىق ستراندجا كۋبوگى ءۇشىن تۋرنيردە ەلىمىزدىڭ بەس بوكسشىسى 1/8 فينالعا شىقتى.

بۇعان دەيىن جارىستىڭ ەكىنشى كۇنى قازاقستان قۇراماسىنىڭ بەس بوكسشىسى شارشى الاڭعا شىعاتىنىن حابارلاعان بولاتىنبىز. سولاردىڭ ەكەۋى – كۇندىزگى، ۇشەۋى كەشكى سەسسيادا قولعاپ ءتۇيىستىردى.

كۇندىزگى ايقاستاردى ءبىرىنشى بولىپ رينگكە كوتەرىلگەن 57 كەلىگە دەيىنگى سالماقتاعى ورازبەك اسىلقۇلوۆ باستادى. ول يرلانديالىق دجۋد گاللاحەرمەن كەزدەستى. جەكپە-جەك قازاق بوكسشىنىڭ باسىمدىعىمەن اياقتالدى. تورەشىلەر 4:1 ەسەبىمەن جەڭىستى اسىلقۇلوۆقا بەردى.

ءبىرىنشى راۋندا قازىلار باسىمدىقتى يرلاند جىگىتكە بەرگەن ەدى. سودان كەيىن بارىن سالعان ورازبەك اقىرى جەڭىس تۇعىرىنان كورىندى. تومەندە سول كەزدەسۋدىڭ ۆيدەوسى جاريالانىپ وتىر.

كەلەسى سپورتشىمىز – 63،5 كەلىگە دەيىنگى سالماقتاعى ەرتۋعان زەينۋللينوۆ يسپان كوندە ويەرا يبارەچچەمەن قولعاپ ءتۇيىستىردى. قورىتىندىدا وتانداسىمىز جەڭىسكە جەتتى.

ەندى ونىڭ 1/8 فينالداعى قارسىلاسى گرۋزين لاشي گاگنيدزەنى ۇتقان وزبەك مۋجيبۋللو تۋرسۋنوۆ بولعالى تۇر. بۇل كەزدەسۋ بۇگىن بولادى.

كەشە ەل قۇراماسىنان 1/16 فينالدا كەشكى سەسسيادا ءۇش بىلعارى قولعاپ شەبەرى شارشى الاڭعا شىقتى. ولاردىڭ قاتارىندا تەزەك تەمىرحان (67 كگ) بولگاريالىق پلامەن يانكوۆتى 4:1، 86 كگ سالماقتاعى بەكزات تاڭاتاروۆ ۇندىستاندىق كارتيكتى 5:0 ەسەبىمەن جەڭىپ، جارىستىڭ كەلەسى ساتىسىنا شىقتى.

ال 54 كەلىدە بەكزات الدامجاروۆ فرانتسيالىق بيللال بەنناماعا 0:5 ەسەبىمەن ەسە جىبەرىپ، جارىستان تىس قالدى.

بۇعان دەيىن 20 اقپاندا ەراسىل تاڭقاي (60 كگ) يتاليالىق دانيەلە سالەرنونى تىزە بۇكتىردى.

داستان كەنجالين،

استانا