SportPress.kz قازاقستان سپورت جاڭالىقتارى
بولگاريانىڭ استاناسى – سوفيا قالاسىندا ءوتىپ جاتقان ستراندجا كۋبوگى ءۇشىن حالىقارالىق تۋرنيردە ەكى بوكسشىمىز قارسىلاستارىن جەڭىپ، التاۋى جارىس جولىنان شىعىپ قالدى.
كۇندىزگى سەسسيادا قازاقستان قۇراماسىنان ءبىرىنشى بولىپ شارشى الاڭعا 51 كەلىگە دەيىنگى سالماقتاعى كەنجە مۇرات ۇلى شىقتى. بىراق تۋرنيرگە كەلگەلى العاش رەت رينگكە كوتەرىلگەن بوكسشىمىز قارسىلاسىنان جەڭىلىپ قالدى. تورەشىلەر جەڭىستى ءبىر اۋىزدان ۇندىلىك بيشماۆيترە چونحگامعا بەردى. ال ۇلتتىق قۇراما بوكسشىلارىمىزدىڭ ءبىرى – ابزال قۇتتىبەكوۆ (92 كگ) گرۋزيالىق ارتەم يوردانيانمەن ايقاستا رەفەري تاراپىنان ءۇش رەت ەسكەرتۋ الىپ، ديسكۆاليفيكاتسياعا ۇشىرادى.
كەشكى سەسسيادا 48 كەلىگە دەيىنگى سالماقتاعى ەرنۇر قايرات گرۋزين لۋكا كۋبلاشيۆيليدەن ۇپاي بولىسىمەن جەڭىلىس تاپتى. بۇدان ءارى 67 كەلىگە دەيىنگى سالماقتاعى تەمىرحان تەزەك وزبەك بەكزود حاميدوۆكە تاپ سولاي جول بەردى. ال 86 كەلىگە دەيىنگى سالماقتاعى بەكزات تاڭاتار «وزبەك-قازاق دەربيىندە» شوحجاحون ابدۋللاەۆتان وسالدىق تانىتتى.
ەڭ سوڭىندا اسا اۋىر سالماقتاعى قامشىبەك قوڭقاباەۆ ەجەلگى قارسىلاسى، وزبەك باحودير جالولوۆپەن شايقاس الدىندا بەلگىسىز سەبەپتەرمەن سايىستان شىعىپ قالدى.
ازىرشە قازاقستان بوكس فەدەراتسياسى دا، سپورتشىنىڭ نەلىكتەن رينگكە شىقپاعانىن اشىعىن ايتپادى.
وسىنىڭ الدىندا قوڭقاباەۆ گوللانديالىق ستەن بەرتەنستى 20 سەكۋندتا نوكاۋتقا جىبەرگەن ەدى. ودان كەيىن ول بوكستاسقان جوق. شارشاعان دا، جاراقات تا العان جوق.
جالپى قوڭقاباەۆ پەن جالولوۆ سوڭعى رەت 2021 جىلدىڭ مامىرى ايىندا كەزدەسكەن. بۇل دۋبايدا وتكەن ازيا چەمپيوناتىنىڭ فينالى بولاتىن. سول جەكپە-جەكتە وزبەك سپورتشىسى جەڭىسكە جەتتى. قولدا بار دەرەككە قاراعاندا، العاش رەت ەكەۋى شارشى الاڭدا 2015 جىلى قولعاپ تۇيىستىرگەن. ودان كەيىن ەكەۋىنىڭ اراسىنداعى ناعىز باسەكە 2017 جىلدان باستالدى. ويتكەنى، سول كەزدە عانا ولار ءوز ەلدەرىنىڭ ءبىرىنشى ءنومىرلى بوكسشىسى اتاندى. بۇعان دەيىن قامشىبەك قوڭقاباەۆ بىرنەشە جىل يۆان دىچكو كولەڭكەسىندە جۇرگەن ەدى. قامشىبەكتىڭ يۆاننىڭ كولەڭكەسىنەن شىققاننان كەيىن دە جالولوۆپەن ءتورت رەت كەزدەسسە دە ءبىر جولى بولمادى. ول وزبەك بوكسشىسىنان 2017، 2019، 2021 جىلدارى ازيا چەمپيوناتىندا، 2019 جىلى الەم چەمپيوناتىنىڭ فينالىندا جەڭىلدى.
بۇل كۇنى قازاقستان قۇراماسى ساپىنان تەك ورازبەك اسىلقۇلوۆ (57 كگ) پەن بەكزاد نۇرداۋلەتوۆ (80 كگ) قانا جەڭىس تويىن تويلادى. اسىلقۇلوۆ برازيليالىق لۋيس وليۆەيرانى تورەشىلەردىڭ ءبىر اۋىزدى شەشىمىمەن ۇتىپ شىقسا، ەكىنشىسى سەربيالىق ارتەم اگەەۆتى ءدال سولاي تىزە بۇكتىردى.
بەكزاد نۇرداۋلەتوۆ تۋرالى ايتساق، ول 2019 جىلى الەم چەمپيونى اتانعان. ودان كەيىن كاسىپقويلار لاگەرىنە اۋىسىپ كەتكەن ەدى. وندا 6 رەت رينگكە شىعىپ، بارىندە دە جەڭىسكە جەتكەن. ەكەۋىن نوكاۋتپەن ۇتقان. ال ونىڭ كەشەگى باسەكەلەسى – نەگىزى رەسەيلىك، ماسكەۋ تۇبىندەگى سەرپۋحوۆ قالاسىندا تۋىپ وسكەن اگەەۆ بىلتىر مامىر ايىندا ەرەۆاندا وتكەن قۇرلىق چەمپيوناتىندا سەربياعا ەۋروپانىڭ التىن جۇلدەسىن الىپ بەرگەن بولاتىن.
داستان كەنجالين،
استانا
