Strandja kýbogy: Qazaqstan boksshylarynyń úsheýi ǵana 1/4 fınalǵa shyqty (VIDEO)

Bolgarııanyń astanasy – Sofııa qalasynda ótip jatqan Strandja kýbogy úshin halyqaralyq týrnırde eki boksshymyz qarsylastaryn jeńip, altaýy jarys jolynan shyǵyp qaldy.

Kúndizgi sessııada Qazaqstan quramasynan birinshi bolyp sharshy alańǵa 51 kelige deıingi salmaqtaǵy Kenje Muratuly shyqty. Biraq týrnırge kelgeli alǵash ret rıngke kóterilgen boksshymyz qarsylasynan jeńilip qaldy. Tóreshiler jeńisti bir aýyzdan úndilik Bıshmavıtre Chonhgamǵa berdi. Al ulttyq qurama boksshylarymyzdyń biri – Abzal Quttybekov (92 kg) grýzııalyq Artem Iordanıanmen aıqasta referı tarapynan úsh ret eskertý alyp, dıskvalıfıkaııaǵa ushyrady.

Keshki sessııada 48 kelige deıingi salmaqtaǵy Ernur Qaırat grýzın Lýka Kýblashıvılıden upaı bólisimen jeńilis tapty. Budan ári 67 kelige deıingi salmaqtaǵy Temirhan Tezek ózbek Bekzod Hamıdovke tap solaı jol berdi. Al 86 kelige deıingi salmaqtaǵy Bekzat Tańatar «ózbek-qazaq derbıinde» Shohjahon Abdýllaevtan osaldyq tanytty.

Eń sońynda asa aýyr salmaqtaǵy Qamshybek Qońqabaev ejelgi qarsylasy, ózbek Bahodır Jalolovpen shaıqas aldynda belgisiz sebeptermen saıystan shyǵyp qaldy.

Ázirshe Qazaqstan Boks federaııasy da, sportshynyń nelikten rıngke shyqpaǵanyn ashyǵyn aıtpady.

Osynyń aldynda Qońqabaev gollandııalyq Sten Bertensti 20 sekýndta nokaýtqa jibergen edi. Odan keıin ol bokstasqan joq. Sharshaǵan da, jaraqat ta alǵan joq.

Jalpy Qońqabaev pen Jalolov sońǵy ret 2021 jyldyń mamyry aıynda kezdesken. Bul Dýbaıda ótken Azııa chempıonatynyń fınaly bolatyn. Sol jekpe-jekte ózbek sportshysy jeńiske jetti. Qolda bar derekke qaraǵanda, alǵash ret ekeýi sharshy alańda 2015 jyly qolǵap túıistirgen. Odan keıin ekeýiniń arasyndaǵy naǵyz báseke 2017 jyldan bastaldy. О́ıtkeni, sol kezde ǵana olar óz elderiniń birinshi nómirli boksshysy atandy. Buǵan deıin Qamshybek Qońqabaev birneshe jyl Ivan Dychko kóleńkesinde júrgen edi. Qamshybektiń Ivannyń kóleńkesinen shyqqannan keıin de Jalolovpen tórt ret kezdesse de bir joly bolmady. Ol ózbek boksshysynan 2017, 2019, 2021 jyldary Azııa chempıonatynda, 2019 jyly álem chempıonatynyń fınalynda jeńildi.

Bul kúni Qazaqstan quramasy sapynan tek Orazbek Asylqulov (57 kg) pen Bekzad Nurdáýletov (80 kg) qana jeńis toıyn toılady. Asylqulov brazılııalyq Lýıs Olıveırany tóreshilerdiń bir aýyzdy sheshimimen utyp shyqsa, ekinshisi serbııalyq Artem Ageevti dál solaı tize búktirdi.

Bekzad Nurdáýletov týraly aıtsaq, ol 2019 jyly álem chempıony atanǵan. Odan keıin  kásipqoılar lagerine aýysyp ketken edi. Onda 6 ret rıngke shyǵyp, bárinde de jeńiske jetken. Ekeýin nokaýtpen utqan. Al onyń keshegi básekelesi – negizi reseılik, Máskeý túbindegi Serpýhov qalasynda týyp ósken Ageev byltyr mamyr aıynda Erevanda ótken qurlyq chempıonatynda Serbııaǵa Eýropanyń altyn júldesin alyp bergen bolatyn.

Dastan KENJALIN,

ASTANA