ستراندجا-2023: وزبەكستان بوكسى تاعى ءبىر جەتىستىككە جەتتى

26 اقپان كۇنى بولگاريا استاناسى – سوفيا قالاسىندا ستراندجا كۋبوگى ءۇشىن وتكەن حالىقارالىق تۋرنيردە وزبەكستان بوكسى تاعى ءبىر جەتىستىككە جەتتى.

Gazeta.uz سايتىنىڭ حابارلاۋىنشا، كەشە تاشكەنت اۋەجايىندا سپورت فۋنكتسيونەرلەر مەن قالا جۇرتشىلىعى وزبەك ەلىنىڭ مەرەيىن كوتەرىپ قايتقان بوكسشىلارىن كۇتىپ العان.

سوڭعى كەزدەرى «كىشى الەم چەمپيوناتى» دەگەن جاناما اتاۋعا يە بولىپ جۇرگەن حالىقارالىق تۋرنيرگە وزبەكستان ەرلەر قۇراماسى 27 بوكسشىدان تۇراتىن ءۇش قۇرام الىپ باردى. ناتيجەسىندە ولار جارىستان 7 التىن، 4 كۇمىس جانە 5 قولا، بارلىعى 16 مەدال الىپ قايتتى. بۇدان باسقا، ايەلدەر قۇراماسى ەلدىڭ ورتاق قورجىنىنا 1 كۇمىس، 1 قولا مەدال قوستى.

وسىلايشا وزبەك جىگىتتەرى جالپى كوماندالىق ەسەپتە ءبىرىنشى ورىندى تالاسسىز جەڭىپ الدى. ەكىنشى ورىنعا 4 التىن، 1 كۇمىس جانە 1 قولا مەدال العان الاڭ يەلەرى – بولگاريا كومانداسى ورنالاستى. ءۇشىنشى ورىن 1 التىن، 2 قولا مەدال العان اقش قۇراماسىنا بۇيىردى. ءتورتىنشى ورىنعا – برازيليا، بەسىنشى ورىنعا – ارمەنيا، التىنشى ورىنعا ءۇندىستان جايعاستى. ال قازاقستان جاساعى 1 كۇمىس، 1 قولا مەدال جيناپ، تۇركيا جانە يتاليا تارلاندارىمەن بىرگە 7-9-ورىنداردى ءبولىستى.

ءبىر قىزىعى، تۋرنيردە 4 جەكپە-جەك وتكىزۋگە ءتيىستى بولعان اسا اۋىر سالماقتاعى وزبەك باحودير جالولوۆ ءبىر عانا اشىق شايقاسپەن التىن مەدال الدى. ول 1/8 فينالدا اقش وكىلى جوشۋا ەدۆاردستى 5:0 ەسەبىمەن ۇتتى. ودان كەيىن شيرەك فينالدا قامشىبەك قوڭقاباەۆ، جارتىلاي فينالدا  ازەربايجاندىق لەزگين ماحامماد ابدۋللاەۆ، ال فينالدا ارميان داۆيت چالويان ونىمەن كەزدەسۋگە شىعۋدان باس تارتتى.

بيىلعى جىلى 74-ءشى رەت وتكىزىلگەن ەجەلگى تۋرنيرگە 42 ەلدەن 450 بىلعارى قولعاپ شەبەرى قاتىستى.

تۋرنير 20 اقپان كۇنى باستالىپ، 26-سى كۇنى اياقتالدى.

جۇلدەگەرلەر ءتىزىمى:

48 كگ: 1. شوديەرجون مەليكۋزيەۆ (وزبەكستان)، 2. ساحاني كۋمير ء(ۇندىستان)، 3. ەرگۋنال سەبانتين (بولگاريا)، لۋكا كۋبلاشۆيلي (گرۋزيا);

51 كگ. 1. حاسانبوي دۋسماتوۆ (وزبەكستان)، 2. رامون نيكانور كۋروگا (ارگەنتينا)، 3. جياماو زانگ (قىتاي)، بيشۆاميترا چونتحام ء(ۇندىستان);

54 كگ. 1. ياسەن رادەۆ (بولگاريا)، 2. ميرازيزبەك ميرزاحاليلوۆ (وزبەكستان)، 3. ساچين ء(ۇندىستان)، فەدەريكو سەررا (يتاليا);

57 كگ. 1. جابەر دياس (بولگاريا)، 2. ورازبەك اسىلقۇلوۆ (قازاقستان)، 3. چيفتچي باتۋحان (تۇركيا)، ارتۋر بازەيان (ارمەنيا);

60 كگ. 1. رادوسلاۆ روسەنوۆ (بولگاريا)، 2. ابدحامجون مۋحيددينوۆ (وزبەكستان)، 3. شۋنكور ابدۋراسۋلوۆ (وزبەكستان)، ديلشود ابدۋمۋرودوۆ (وزبەكستان);

63،5 كگ. 1. مۋجيبيللو تۋرسۋنوۆ (وزبەكستان)، 2. رۋسلان ابدۋللاەۆ (وزبەكستان)، 3. ماكس ماكلەري (اۆستراليا)، ەميليو گارسيا (اقش);

67 كگ. 1. اسادحۋدجا مۋيدينحۋدجاەۆ (وزبەكستان)، 2. بەكزود حاميدوۆ (وزبەكستان)، 3. گۋرگەن مادويان (ارمەنيا)، سەباستيان تەرتەريان (دانيا);

71 كگ. 1. سايدجامشيد جافاروۆ (وزبەكستان)، 2. ەردەمير تۋگرۋلحان (تۇركيا)، 3. نيكولاي تەرتەريان (دانيا)، نۋريسلوم يسمويلوۆ (وزبەكستان);

75 كگ. 1. رامي كيۆان (بولگاريا)، 2. ۆيليام چولوۆ (بولگاريا)، 3. نۇرقانات رايىس (قازاقستان)، حاۆاسبەك اسادۋللاەۆ (وزبەكستان);

80 كگ. 1. روببي گونسالەس (اقش)، 2. امبارتسۋم اكوپيان (ارمەنيا)، 3. جاسۋربەك يۋلداشەۆ (وزبەكستان)، كەلين كاسسيدا (يرلانديا);

86 كگ. 1. شاحجاحون ابدۋللاەۆ (وزبەكستان)، 2. ۆينچەنتسو ليززي (يتاليا)، 3. گەورگي كۋشيتاشۆيلي (گرۋزيا)، توماس نيەدزيەۆسكي (پولشا);

92 كگ. 1. كەنو ماچادو (برازيليا)، 2. جۋليو كاستيلو (ەكۆادور)، 3. ۆاگكان نانيتزانيان (گرەكيا)، دجەيمەر تيللي (اقش);

+92 كگ. 1. باحودير جالولوۆ (وزبەكستان)، 2. داۆيت چالويان (ارمەنيا)، 3. ماحامماد ابدۋللاەۆ (ازەربايجان)، ابنەر جۋنيور (برازيليا).

 

Cەرىك ءپىرنازار،

قىزىلوردا