«Jeńis» dzıýdo klýby Qurlyqtyq lıgaǵa qatysady

Dzıýdodan Olımpııalyq oıyndardyń eki dúrkin júldegeri, álem chempıony Eldos Smetov Qaraǵandyda sporttyń osy túrinen qurylǵan «Jeńis» klýbynyń kapıtany boldy. Naqtyraq aıtsaq, kapıtany bolyp tańdaldy.

Ol endi 8 sáýirde dzıýdodan Máskeýde bastalatyn qurlyqtyq lıgaǵa komandany bastap barady.Qaraǵandy komandasynyń quramyna Eldos Smetovten bólek, Jansaı Smaǵulov, Islam Bozbaev sekildi álemdik arenalarda el namysyn qorǵaǵan balýandar bar.

Olardan basqa «Jeńis» klýbynyń quramyna  Ǵumar Qyrǵyzbaev, Aıbolat Ystybaı, Nurzat Salymbaev, Artem Shtýrbabın, Asqar Narqulov, Baqytjan Ábdýrahmanov, Mádı Amangeldi, Rýslan Musaev, Bekádil Sháımerdenov, Aıbol Nysanáli, Ersultan Muzapparov, Erlan Sherov, Erasyl Qajybaı, Sanjar Jabborov pen Temýr Rahymov kirip otyr.

Qurlyqtyq lıga komandalyq beldesý retinde ótkiziledi. Bıylǵy maýsymda 7 memlekettiń 20 komandasy kúsh synasyp kóredi. Olardyń arasynda Reseı, Úndistan, Tájikstan, Serbııa, Belarýs, Iran men Qazaqstan bar.

Lıganyń jerebe qorytyndysy boıynsha «Jeńis» klýby A tobyna tústi. Qaraǵandy komandasyna «Sambo 70» (Máskeý), «Staıkı» (Belarýs), «Jemchýjına» (Krasnodar), «Hodjı Sharıf» (Tájikstan) klýbtary qarsylas bolady. Erejege sáıkes, komandalar kelesi raýndqa shyǵý úshin topta kemi úshinshi oryn alý kerek. Ár komanda óz tobynda tórt kezdesý ótkizedi. Jobanyń fınaly 8 shildege josparlanǵan. Al jobanyń jalpy júlde qory – 100 myń dollar.

Qaraǵandy klýby belgili meenat Almaz Alsenovtyń bastamasymen qurylǵan.

Dastan KENJALIN,

ASTANA