جۇلدە قورى – 75 ميلليون تەڭگە: شىمكەنتتە رەسپۋبليكالىق ەتنو فەستيۆال وتەدى (كەستە)

20 – 22 ناۋرىز ارالىعىندا شىمكەنت قالاسىندا ۇلىستىڭ ۇلى كۇنى ناۋرىز مەيرامىن تويلاۋ جانە جاڭا يپپودرومنىڭ اشىلۋى اياسىندا GREAT QAZAQ GAMES رەسپۋبليكالىق ەتنوفەستيۆالى وتەدى. BIG QAZAQ GAMES – كوشپەندىلەردىڭ ۇلتتىق كودى نەگىزىندەگى وليمپيادانىڭ انالوگى. بۇل تۋرالى halyq-uni.kz حابارلادى.

جوبانىڭ نەگىزگى ماقساتى – ۇلتتىق قۇندىلىقتارىمىزدى دارىپتەپ، وسكەلەڭ ۇرپاققا ناسيحاتتاۋ، بابالار اماناتىنىڭ عاسىردان عاسىرعا جەتۋىنە ىقپال ەتۋ، ادىلەتتى قازاقستاننىڭ ءاربىر ازاماتىنىڭ ونەرىن، قابىلەتىن باعالاۋ، قولداۋ، قۇرمەتتەۋ، وڭتۇستىك ءوڭىردىڭ ءسان-سالتاناتىن ارتتىرۋ، وڭىرلەردىڭ ءوزارا دوستىعىن، قارىم-قاتىناسىن نىعايتۋ.

شىمكەنتتەگى ايتۋلى ءىس-شاراعا قازاقستاننىڭ بارلىق وڭىرلەرىنەن باسقا، قىرعىزستان، وزبەكستان مەن ازەربايجان ەلىنىڭ وكىلدەرى قاتىسادى.

فەستيۆال اياسىندا مىنا كاتەگوريالار بويىنشا جارىس وتەدى:

ۇلتتىق تاعامدار: ەت اسۋ، سىرنە، قۋىرداق، باۋىرساق، جەنت، قىمىز، شۇبات;

ۇلتتىق ويىندار: كوكپار، الامان بايگە، توپ بايگە، قۇنان بايگە، تەڭگە ءىلۋ، اۋدارىسپاق، قازاق كۇرەسى، ساداق اتۋ، جامبى اتۋ;

ۇلتتىق كيىم: ەرلەر كيىمى، شاپان، كامزول، ۇيلەنۋ كيىمى، ساۋكەلە، تاقيا;

ۇلتتىق ونەر: ايتىس، جىر-تەرمە، ءداستۇرلى ءان، كۇي قوبىز، كۇي دومبىرا، جەتىگەن، بي.

سونداي-اق «ەڭ جاقسى كيىز ءۇي» 5 نەگىزگى نوميناتسيا بويىنشا جارىستار وتەدى، وندا ەڭ مىقتى سپورتشىلار (ۇلتتىق ويىندار)، حالىق ونەرىنىڭ شەبەرلەرى (ۇلتتىق تاعامدارى، ۇلتتىق كيىمدەرى، مۋزىكانتتار، قولونەرشىلەر جانە ت.ب.) قاتىسادى. ءىس-شارانىڭ جۇلدە قورى – 75 ميلليون تەڭگە.

ءىس-شارا وتەتىن جەردە 153 كيىز ۇيدەن تۇراتىن ەتنيكالىق اۋىل تىگىلىپ، ساۋدا الاڭدارى، بالالار ايماقتارى، ينتەراكتيۆتى ءىس-شارالار (تاعام، ونەر، ءسان كورسەتىلىمى) سياقتى ءتۇرلى ويىن-ساۋىق شارالارى جوسپارلانعان.

GREAT QAZAQ GAMES رەسپۋبليكالىق ەتو فەستيۆالىنىڭ 20 ناۋرىزعا ارنالعان باعدارلاماسى:

فەستيۆال ساعات 11:00-دە باستالىپ، 18:00-گە دەيىن جالعاسادى. رەسمي اشىلۋى جاڭا يپپودرومدا وتەدى.

ساعات 12:30-دا ويىندار باستالىپ، تۇسكى ساعات 13:00-دەن كەشكى ساعات 17:00-گە دەيىن 4 نوميناتسيا بويىنشا جارىستار وتەدى.

قالادان ارنايى اۆتوبۋستار ۇيىمداستىرىلادى. يپپودروم اۋماعىنا كىرۋ تەگىن.

21 ناۋرىزداعى باعدارلاما:

10:00 — تەاترلاندىرىلعان بايگە: ۇلكەن قازاندا «ناۋرىز كوجە» باس تاعامىن دايىنداۋ

11:00-14:00 – ءتورت سانات بويىنشا نوميناتسيا جارىستارى

14:00 – ماراپاتتاۋ ءراسىمى

15:00 – HASSAK مەرەيتويلىق كونتسەرتى

15:00-18:00 – شەبەرلىك سىنىپتارى

19:00 – استانا الاڭىندا ءۇش ساعاتتىق گالا-كونتسەرت

22 ناۋرىزعا ارنالعان باعدارلاما:

10:00 – تەاترلاندىرىلعان بايگە: ۇلكەن قازاندا «ناۋرىز كوجە» باس تاعامىن ازىرلەۋ;

11:00-14:00 – ءتورت سانات بويىنشا جارىستار

14:00 – ماراپاتتاۋ ءراسىمى

15:00 – HASSAK مەرەيتويلىق كونتسەرتى

15:00-18:00 – شەبەرلىك سىنىپتارى

19:00 – استانا الاڭىندا ءۇش ساعاتتىق گالا-كونتسەرت