استانادا ازيا چەمپيونى اتانعان بالۋاندار قوماقتى اقشا الادى

9 – 14 ءساۋىر ارالىعىندا استانادا گرەك-ريم، ەركىن جانە ايەلدەر كۇرەسىنەن وتەتىن XXXVI ازيا چەمپيوناتى بولادى. وعان قۇرلىقتىڭ 24 ەلىنەن 300-دەن استام بالۋان قاتىسادى. ولاردىڭ اراسىندا وليمپيالىق ويىنداردىڭ 7 جۇلدەگەرى، 5 الەم چەمپيونى بولادى.

مادەنيەت جانە سپورت مينيسترلىگى سپورت جانە دەنە شىنىقتىرۋ ىستەرى كوميتەتى توراعاسىنىڭ ورىنباسارى ايگۇل بەكتەنوۆانىڭ ايتۋىنشا، بۇل كۇرەس دوداسى وليمپياداعا ليتسەنزيالىق تۋرنير ەمەس. ول ازيا ويىندارى مەن الەم چەمپيوناتىنىڭ الدىنداعى نەگىزگى جارىستاردىڭ ءبىرى بولىپ ەسەپتەلەدى.

بۇل جارىسقا ەلىمىزىدڭ قۇراما كومانداسى كۇرەستىڭ ءۇش تۇرىنەن قاتىسادى. بارلىعى 30 بالۋان كىلەمگە شىعادى. ولاردىڭ ورتا جاسى گرەك-ريم كۇرەسىنەن – 29 جاس، ايەلدەر كۇرەسىنەن – 25 جاس جانە ەركىن كۇرەستەن – 24 جاس بولىپ كەلەدى، –  دەدى مينيسترلىكتىڭ وكىلى.

سونداي-اق، ول چەمپيونات جۇلدەگەرلەرىنە بەرىلەتىن اقشالاي سىيلىقتىڭ كولەمىن ايتتى.

ونىڭ ايتۋىنشا، ازيا چەمپيونى اتانعان بالۋاندارعا 2 300 دوللار، ەكىنشى ورىن العاندارعا 1 400 دوللار جانە ءۇشىنشى ورىن العان سپورتشىعا 900 دوللار سىياقى قاراستىرىلعان. وسىنداي سىياقى جاتتىقتىرۋشىلارعا دا بەرىلەدى. سونىمەن قاتار، «حالىقارالىق دارەجەدەگى سپورت شەبەرى» دەگەن اتاق قاراستىرىلعان.

داستان كەنجالين،

استانا