قازاق-قىرعىز «كوكپار» فەدەراتسيالارىنىڭ باسشىلارى كەزدەستى

بۇگىن استانادا ۇلتتىق سپورت قاۋىمداستىعىنىڭ پرەزيدەنتى يسلامبەك سالجانوۆ پەن «كوكپار» فەدەراتسياسىنىڭ پرەزيدەنتى باۋىرجان يساباەۆ قىرعىز رەسپۋبليكاسى «كوك ءبورۇ» فەدەراتسياسىنىڭ پرەزيدەنتى تالاس بەگاليەۆپەن كەزدەستى. بۇل تۋرالى Halyq Uni حابارلادى.

جيىندا قاتىسۋشىلار قوردالانعان بىرنەشە ماسەلەلەردى كوتەرىپ، ولاردى وڭتايلى شەشۋ جونىندە، سونىمەن قاتار، كوكپار سپورتىنىڭ دامۋى مەن ونداعى ەرەجەلەردى بىرلەسە بەكىتۋ جايىن تالقىلادى.

ودان بولەك، تاراپتار كەلەسى جىلى قازاقستاندا وتەتىن V-كوشپەندىلەر ويىندارىن وتە جوعارى دەڭگەيدە وتكىزۋ جوسپارىن ايتىپ، كوكپار ويىنىن بۇكىل الەمگە پاش ەتۋ ءۇشىن بىرلەسە، تىعىز جۇمىس ىستەۋگە كەلىستى.

سونىمەن قاتار، كەزدەسۋدە قوس ەلدىڭ فەدەراتسيالارى كوكپار ويىندارىنىڭ بىرجىلدىق كۇنتىزبەلىك جوسپارىن بەكىتۋ جانە ونىڭ وتەتىن ورنى مەن تۋرنير فورماتىن بەكىتۋ، كوكپار جانە كوك ءبورۇ ويىندارىنىڭ ەرەجەلەرىن زاماناۋي تالاپتارعا ساي ەتىپ جاساۋدا ساراپشىلار مەن تاريحشىلاردى، ەكى جاقتىڭ عالىمدارىن بىرگە جۇمىلدىرۋعا، سونداي-اق، وسى جىلدىڭ تامىز ايىندا قىرعىزستاننىڭ شولپان اتا قالاسىندا كوك بورۇدەن وتەتىن حالىقارالىق ءتۋرنيردىڭ فورماتىن بىرگە كەلىستى.

سونداي-اق، باۋىرلاس ەلدىڭ تاراپتارى الداعى ۋاقىتتا ەكى ەلدە وتەتىن بارلىق جولداستىق جانە باسقا دا جارىستارعا ءوز كوماندالارىن اكەلىپ، ءبىر-ءبىرىن قولدايتىندىقتارىن جەتكىزدى.

كەزدەسۋ سوڭىندا باۋىرلاس قوس ەلدىڭ تاراپتارى بۇدان بىلاي ستراتەگيالىق ارىپتەستىك ورناتىپ، الەم حالىقتارىنىڭ كوكپارعا دەگەن قىزىعۋشىلىعىن بىرلەسە ارتتىرۋعا ۋاعدالاستى.