تۇركىمەنستاندا «اركاداگ» كلۋبىنا قۇرامانىڭ 17 ويىنشىسى الىندى

تۇرىكمەنستاندا جاڭادان قۇرىلىپ، بىردەن يوكارى (جوعارى) ليگادان ورىن العان «اركاداگ» فۋتبول كلۋبىنا قاتارىن ەل قۇراماسىنىڭ ويىنشىلارىمەن تولتىردى. بۇل تۋرالى «حرونيكا تۋركمەنيستانا» اقپارىنا سۇيەنگەن rast.kz حابارلادى.

«فەرگانا» اقپارات باسىلىمىنىڭ جازۋىنشا، جاڭا پايدا بولعان «اركاداگ» كلۋبىندا ورتالىق ازيا چەمپيوناتىنا قاتىسۋ ءۇشىن تۇرىكمەنستان قۇراماسىنا شاقىرىلعان 25 فۋتبولشىنىڭ 17-ءسى، ياعني 68 پايىزى وينايدى.

كوماندا باسشىلارى تەك قۇرامانىڭ قازىر سيانگاننىڭ (گونكونگ) «كيتچي» كومانداسىندا ويناپ جۇرگەن ليدەرى رۋسلان مينگازوۆتى عانا شاقىرماپتى. كوماندانىڭ باس جاتتىقتىرۋشىسى مەرگەن ورازوۆ وسى كەزگە دەيىن «وتە كوپ جۇمىس اتقارعان» فۋتبولشىعا تىنىعۋعا مۇمكىندىك بەرگەنىن ايتقان.

ەسكە سالا كەتەيىك، 2019-2020 جىلدارى بۇل فورۆارد پاۆلوداردىڭ «ەرتىس» كومانداسى ساپىندا 13 رەت الاڭعا شىعىپ، 2 گول سوققان.

ال «اركاداگ» قازىر يوكارى (جوعارى) ليگا چەمپيوناتىندا ەشكىمگە دەس بەرەر ەمەس. ول بيىل كوكتەمدە باستالعان جاڭا بىرىنشىلىكتە 8 تۋر وينالعاننان كەيىن 8 ۇتىسپەن جەكە-دارا توپ باستاپ كەلەدى. كوماندا 31 گول سوعىپ، 7 دوپ جىبەرىپ العان، 24 ۇپايى بار. بۇدان بولەك، تاعى 2 جولداستىق كەزدەسۋدى جەڭىسپەن اياقتاعان.

كوماندا قازىر سالىنىپ جاتقان، بىراق ءالى تولىق تۇرعىزىلىپ بىتپەگەن اركاداگ قالاسىنىڭ نامىسىن قورعايدى. شاھار احال ۆەلاياتىنىڭ اۋماعىنا ورنالاسقان. ول بۇرىنعى پرەزيدەنت، قازىر تۇرىكمەنستان حالك ماسلاحاتىنىڭ (پارلامەنتىنىڭ) رايىسى، وسى كەزدەگى پرەزيدەنت سەردار بەردىمۋحامەدوۆتىڭ اكەسى گۋربانگۋلى بەردىمۋحامەدوۆتىڭ قۇرمەتىنە بوي كوتەرىپ جاتىر.

«اركاداگ» – گۋربانگۋلى بەردىمۋحامەدوۆكە زاڭ جۇزىندە بەرىلگەن رەسمي اتاق. ول «جەلەۋشى»، «جەبەۋشى»، «سۇيەۋشى» دەگەن ماعىنانى بەرەدى. بىلايىنشا ايتقاندا، «ارقادا تۇرعان تاۋ»، «ارقا تىرەۋشى تاۋ» دەگەن تىركەستەن شىققان. تۇرىكمەن جۇرتى ول تۇرعاندا وزدەرىن «ارقالارىن تامعا سۇيەگەندەي» بولىپ ارقالانىپ، رۋحتانىپ، جىگەرلەنىپ، شيىرشىق اتىپ جۇرەتىن بولسا كەرەك.