«راس اقپارات بەرىڭدەر»: مەسسي قاي كلۋبقا اۋىساتىنىن ايتتى

ارگەنتينا قۇراماسىنىڭ شابۋىلشىسى ليونەل مەسسي قاي كلۋبقا اۋىساتىنىن ايتتى. ول Mundo Deportivo باسىلىمىنا بەرگەن سۇحباتىندا سوڭعى كەزدە بولاشاق كومانداسىنا قاتىستى الىپ-قاشپا اڭگىمەنىڭ بولىپ جاتقانىن، يسپانيانىڭ «بارسەلونا» مەن ساۋد ارابياسىنىڭ «ءال-حيلال» كومانداسىندا وينامايتىنىن ەسكەرتتى.

مەسسي تاڭداۋدى اقش-تىڭ MLS ليگاسىنا جاساعانىن مالىمدەدى.

«بارسەلوناعا» قايتىپ بارمايمىن. «ءال-حيلال» كلۋبىنىڭ ۇسىنىسىنا دا كەلىسكەن جوقپىن. راس اقپارات بەرىڭدەر. مەن «ينتەر ماياميگە» اۋىسامىن. بۇل كوماندا اقش-تىڭ MLS ليگاسىندا وينايدى. ءالى كەلىسىمشارتقا قاتىستى ازداعان ماسەلە شەشىلگەن جوق. بىراق اۋىزشا 100 پايىزعا شەشىلىپ قويعان، — دەدى مەسسي.

ەسكە سالا كەتسەك، ارگەنتينا قۇراماسىنىڭ شابۋىلشىسى «پاري سەن-جەرمەن» كلۋبىنىڭ ساپىندا سوڭعى رەت 3 ماۋسىمدا الاڭعا شىقتى. سول كۇنى ول «كلەرمون» كومانداسىنا قارسى وينادى. ودان كەيىن ونىڭ قاي ەلدىڭ كلۋبىندا وينايتىنى بەلگىسىز بولعان. ەندى ءوزى ايتقانداي، ماسەلە 100 پايىزعا شەشىلىپتى.

ال «ءال-حيلال» كلۋبىنىڭ باسشىسى مەسسيدىڭ ««ينتەر ءماياميدى» تاڭداعىنان ەستىگەندە فۋتبولشىعا تاعى 300 ملن ەۋرو قوسىپ بەرگىسى كەلگەن دەگەن بار. ءسويتىپ، وعان ارابتار ءۇش جىلعا 1 ملرد 500 ملن ەۋرو تولەگىسى كەلگەن ەكەن.

مەسسي 2021 جىلدان باستاپ پاريجدىك كلۋب نامىسىن قورعادى. وتكەن ماۋسىمدا ارگەنتينالىق شابۋىلشى 58 ماتچقا قاتىسىپ، 22 گول سالىپ، 30 ناتيجەلى پاسپەن كوزگە ءتۇستى. ول پسج-نىڭ قۇرامىندا ەكى رەت فرانتسيانىڭ چەمپيونى بولىپ، ءبىر رەت وسى ەلدىڭ سۋپەركۋبوگىنىڭ يەگەرى اتاندى.

مەسسي – «التىن دوپ» سىيلىعىن 7 رەت، «التىن بۋتسى» پرەمياسىن 6 رەت العان تاريحتاعى جالعىز فۋتبولشى.

داستان كەنجالين،

استانا

 

View this post on Instagram

 

A post shared by Inter Miami CF (@intermiamicf)