Qazsport تەلەارناسىنا 10 جىل تولدى (فوتو)

استانادا Qazaqstan تەلەراديوكورپوراتسياسى Qazsport تەلەارناسىنىڭ 10 جىلدىق مەرەيتويىنا ارنالعان سالتاناتتى شارا وتكىزدى، دەپ حابارلادى ترك-نىڭ ءباسپاسوز قىزمەتى.

Open Air  پىشىنىندە ۇيىمداستىرىلعان مەرەكەلىك كەشكە اقپارات جانە قوعامدىق دامۋ ءمينيسترى دارحان قىدىرالى، مادەنيەت جانە سپورت ءمينيسترى اسحات ورالوۆ، پارلامەنت دەپۋتاتتارى، فەدەراتسيا وكىلدەرى مەن سپورتشىلار قاتىستى.

Qazsport تەلەارناسى Qazaqstan رەسپۋبليكالىق تەلەراديوكورپوراتسياسىنىڭ قۇرامىنان 2013 جىلدىڭ 1 شىلدەسىنەن باستاپ اشىلدى. وسى ارالىقتا ارنانىڭ حابار تاراتۋ كولەمى 66 723 ساعات بولدى. كورەرمەن نازارىنا 15 مىڭ ترانسلياتسيا ۇسىنىلدى.

اقپارات جانە قوعامدىق دامۋ ءمينيسترى دارحان قىدىرالى ەلىمىزدەگى تۇڭعىش سپورت تەلەارناسىن العاشقى بەلەسىمەن قۇتتىقتاي كەلە، بيىل سپورت جۋرناليستيكاسىنا ەرەكشە كوڭىل بولىنگەنىن اتاپ ءوتتى.

Qazsport 10 جىلدا ۇلكەن بەلەستەن ءوتتى. سپورتتىق جارىستاردى تاراتىپ قانا قويماي، سپورتتىق رۋحتىڭ بايراعىنا اينالدى.  ءبىز سپورت جۋرناليستيكاسىنا ەرەكشە كوڭىل ءبولىپ وتىرمىز. بيىلعى «تۇمار» بايگەسىنە تۇڭعىش رەت سپورت جۋرناليستيكاسى بويىنشا اتالىم قوسىلدى. ارامىزدان ەرتە كەتكەن امانگەلدى سەيىتحان اتىنداعى نوميناتسياعا لايىق ماماندار وسى تەلەارنادان دا شىعادى دەگەن ويدامىن، — دەدى مينيستر.

مادەنيەت جانە سپورت ءمينيسترى اسحات ورالوۆ ءپاتريوتيزمدى دامىتۋدا وتاندىق سپورتتىڭ ءرولى ەرەكشە ەكەنىن ايتتى.

ءپاتريوتيزمدى دامىتۋدا سپورتتىڭ ورنى ەرەكشە. كوك تۋىمىزدى جەڭىس تۇعىرىنان جەلبىرەتەتىن دە، ءانۇرانىمىزدى شىرقاتاتىن دا ءبىزدىڭ سپورتشىلار. ال ولاردىڭ جەڭىسىن Qazsport تەلەارناسى ارقىلى ناسيحاتتاپ، جاس بۋىننىڭ بويىنا وتانسۇيگىشتىك قاسيەتتى دارىتامىز. ون جىلدىقتارىڭىز قۇتتى بولسىن!، — دەدى ول.

مەرەكەلىك كەشكە وليمپيالىق ويىنداردىڭ جۇلدەگەرى داۋلەت تۇرلىحانوۆ، بوكستان وليمپيادا چەمپيونى سەرىك ساپيەۆ، بوكستان الەم چەمپيونى سانجار تاشكەنباي، اۋىر اتلەتيكادان ءتورت دۇركىن الەم چەمپيونى يليا يلين، شورت-ترەكتەن الەم كۋبوگىنىڭ جۇلدەگەرى ابزال اجىعاليەۆ، كوركەم گيمناستيكادان حالىقارالىق دارەجەدەگى سپورت شەبەرى اننا اليابەۆا قاتىسىپ، Qazsport ارناسىن مەرەيتويىمەن قۇتتىقتادى.

جيىندا Qazaqstan تەلەراديوكورپوراتسياسىنىڭ باسقارما ءتورايىمى ءلاززات تانىسباي ارنانىڭ بۇگىنگى باعىت-باعدارى مەن الداعى جوسپارلارى تۋرالى اتاپ ءوتتى.

10 جىلدا ارنا سپورت جۋرناليستەرىنىڭ، سپورت كوممەنتاتورلارىنىڭ ۇستاحاناسىنا اينالدى. ولاردىڭ كاسىبي شىڭدالۋىنا زور ۇلەس قوستى. Qazsport ارناسىنىڭ نەگىزگى ماقساتى – وتاندىق كورەرمەندەردى رەسپۋبليكالىق، حالىقارالىق، الەمدىك جارىستاردىڭ ترانسلياتسياسىمەن قامتۋ، سونىمەن قوسا قازاقستاندىقتاردى سالاۋاتتى ءومىر سالتىنا باۋلي وتىرىپ، كىشكەنتاي كورەرمەندەرىمىزدىڭ اراسىنان سپورت جۇلدىزدارىنىڭ، بولاشاق چەمپيونداردىڭ شىعۋىنا ىقپال ەتۋ.

الدا  سپورت جانكۇيەرلەرىنە بيىلعى XIX جازعى ازيا ويىندارىن، XXXIII جازعى وليمپيالىق ويىنداردى، فۋتبولدان 2024 جىلعى ەۋروپا چەمپيوناتىن كورسەتۋ بويىنشا كەلىسسوزدەر جۇرگىزىلۋدە، — دەدى باسقارما ءتورايىمى.

Qazsport تەلەارناسى تاۋلىگىنە 18 ساعات حابار تاراتادى. تەلەارنا سپورتتىق ترانسلياتسيالاردان بولەك، Sport Review اقپاراتتىق-ساراپتامالىق باعدارلاماسىن،Qazsport الاڭى توك-شوۋىن، ەل فۋتبولىنا ارنالعان «دوپ دودا»، «تۋر پو تۋرۋ»،  Pro Football جوبالارىن،  حوككەيگە ارنالعان Pro Hockey، ۆولەيبول سپورتىنا باعىتتالعان «س volley ك پوبەدە»، كاسىپقوي بوكس باعىتىنداعى The  Ring، سپورتتىڭ ءار ءتۇرىن قامتيتىن «جۇيرىكتەر جولى» جوبالارىن تۇراقتى تۇردە كورسەتىپ كەلەدى.

فوتو: Qazaqstan تەلەراديوكورپوراتسياسى