«جامبى اتۋ» فەدەراتسياسى رەسمي تۇردە حالىقارالىق اليانس مۇشەسى اتاندى

ەلىمىزدە ات ۇستىندە ساداق اتۋ سپورتى رەسمي تۇردەگى دامۋ جولىن 2014 جىلى باستادى. ال، بۇگىندە جامبى اتۋدان جاسوسپىرىمدەر، جاستار، ەرەسەكتەر اراسىنداعى قازاقستان چەمپيوناتى تۇراقتى تۇردە ءوتىپ تۇرادى، دەپ حابارلادى halyq-uni.kz.

جۋىردا قر «جامبى اتۋ» فەدەراتسياسىنىڭ پرەزيدەنتى ەركەبۇلان يلياسوۆ اتالعان سپورت ءتۇرىن حالىقارالىق دەڭگەيدە دامىتۋ ماقساتىندا 2023-2027 جىلدارعا ارنالعان دامۋ باعدارلاماسىن قابىلدادى.

وسى دامۋ باعدارلاماسى اياسىندا ۆەنگريا ەلىندە ءوتىپ جاتقان الەم كۋبوگىندا حالىقارالىق كەلىسىمدەر جاسالدى.

الەم كۋبوگىنا بارعان حالىقارالىق ات ۇستىندە ساداق اتۋ اليانسى (شتاب-پاتەرى فرانتسيادا ورنالاسقان) پرەزيدەنتى الان لە گالمەن ەكى جاقتى ىنتىماقتاستىققا قول قويىلدى.

سونداي-اق، ات ۇستىندە ساداق اتۋدان ۆەنگريا اكادەمياسىنىڭ پرەزيدەنتى كريستوفەر نەمەتيمەن دە ەكى جاقتى ىنتىماقتاستىققا قول قويىلدى.

اتالعان مەموراندۋمدار اياسىندا ەلىمىزدەگى جامبى اتۋ سپورتى جاڭا قارقىنمەن دامىماق. سەبەبى، ىنتىماقتاستىقتا حالىقارالىق نەگىزدەگى ادىستەمەلىك تاجىريبە الماسۋلار، سەمينارلار مەن سپورتتىق جاتتىعۋلار وتكىزۋ، وسى سپورت تۇرىندەگى جاڭا تەحنولوگيالار مەن وزگەرىستەردى ەكى جاقتى وڭتايلاندىرۋ ماسەلەلەرى قامتىلعان.

حالىقارالىق دەڭگەيدەگى كەلىسىمدەر ناتيجەسىندە ەلىمىزدە ات ۇستىندە ساداق اتۋ اكادەمياسى اشىلىپ، ساداق، جەبە جاساۋ ءوندىرىسى ىسكە قوسىلاتىن بولادى.

ايتا كەتەيىك، رەسپۋبليكالىق «جامبى اتۋ» فەدەراتسياسى ۇلتتىق سپورت قاۋىمداستىعىنىڭ قۇرامىنا كىرەدى. ال، قاۋىمداستىقتىڭ پرەزيدەنتى بولىپ وتكەن جىلدىڭ قىركۇيەك ايىنان باستاپ بەلگىلى كاسىپكەر جانە مەتسەنات، Altyn Qyran Foundation قوعامدىق قورى قامقورشىلىق كەڭەسىنىڭ توراعاسى يسلامبەك سالجانوۆ سايلانعان بولاتىن.

فوتو: ۇلتتىق سپورت قاۋىمداستىعى