داۋلەتكەرەي كاپ ۇلى: «رەسپۋبليكا كۇنىندە تاعى 60 قالامگەرگە سىياقى بەرەمىز»

جاقىندا استانادا قالا كۇنى قارساڭىندا ەلوردا اكىمدىگى مەن قازاقستان جازۋشىلار وداعىنىڭ استانا قالالىق فيليالىنىڭ قولداۋىمەن وتكەن «استانا – شابىت ارقاۋى» اتتى مادەني ءىس-شاراسىندا استانالىق 80 قالامگەر، ودان كەيىن 25 جاس اقىن-جازۋشى 500 مىڭ تەڭگە كولەمىندە سەرتيفيكات العان بولاتىن. ەندى قازاقستان جازۋشىلار وداعىنىڭ حاتشىسى، استانا قالالىق فيليالىنىڭ ديرەكتورى داۋلەتكەرەي كاپ ۇلىنىڭ ايتۋىنشا، رەسپۋبليكا كۇنىندە تاعى 60 ادامعا 500 مىڭ تەڭگەنىڭ سەرتيفيكاتى تاپسىرىلادى. ءسويتىپ، استاناداعى جازۋشىلار وداعىنا مۇشە 165 ادام اقشالاي سىياقى الاتىن بولادى.

-داۋلەتكەرەي كاپ ۇلى، استانالىق قالامگەرلەرگە اقشالاي سەرتيفيكات تاپسىرعاندارىڭىز جاقسى ءىس بولعان ەكەن. بۇل كىمنىڭ باستاماسى، يدەياسى؟

-بۇل يدەيا مەنىكى. ءبىز الماتىداعى قالامگەرلەردى ءۇش جىل قاتارىنان ماراپاتتاپ كەلەمىز. وسىنى نەگە استانادا جاساماسقا دەپ قالا اكىمدىگىنە حابارلاسىپ، ايتتىم. بۇعان دەيىن ەكى جىل قاتارىنان بۇرىنعى قالا اكىمىنە ايتىپ كەلدىم. اكىمدىكتىڭ تابالدىرىعىن توزدىرىپ، قالا اكىمىنە قايتا-قايتا ايتىپ ءجۇردىم. ەندى مىنە، استاناعا جاڭا اكىم كەلگەننەن كەيىن ماسەلە شەشىلدى. قالا اكىمى 20 كۇننەن كەيىن قابىلداپ، ماسەلەنى كوپ سوزگە كەلمەي شەشىپ بەردى.

-جاقسى بولعان ەكەن. استانا كۇنى قارساڭىندا نەشە ادام اقشالاي سىياقى الدى؟

-بارلىعى 105 ادام الدى. ونىڭ ىشىندە اعا بۋىن وكىلدەرىنەن 80 ادام السا، 25 جاس قالامگەرگە سەتيفيكاتپەن تاپسىرىلدى. قالامگەرگە مۇنداي قۇرمەت استانا تاريحىندا بۇرىن-سوڭدى بولماعان. تۇڭعىش رەت بولدى. وسى جەردە مەن 80 قالامگەردىڭ سەرتيفيكات الۋىنا ۇلەس قوسقان  مادەنيەت باسقارماسىنىڭ باسشىسى جاڭاباي مەيىرمانقۇلوۆقا دا العىس ايتامىن.

جالپى، استانا استانا بولعالى وسى قالادا تۇرىپ كەلە جاتقان قالامگەرلەردىڭ، ونىڭ ىشىندە اعا بۋىننىڭ، «استانا – ارمان قالا» دەپ الىپ ۇشىپ جەتەتىن جاس قالامگەرلەردىڭ استانادا رۋحاني ورتا قالىپتاستىرۋدا، قالانىڭ ادەبي الەۋەتىن كوتەرۋدە ەڭبەگى زور.  استانا تەك قانا اكىمشىلىك، ساياسي، قارجىلىق ورتالىق ەمەس، رۋحاني ورتالىققا اينالىپ كەلەدى. مىسالى، قالامگەرلەر اللەياسى، جازۋشىلار ءۇيى، جۋرناليستەر ساياباعى اشىلدى. وسىنىڭ ءبارى اكىمدىكتىڭ قولداۋىمەن جاسالىنعان يگى-شارا.

-الداعى ۋاقىتتا جازۋشىلار وداعىنىڭ مۇشەلەرىنە تاعى سىياقى بەرەسىزدەر مە؟

-ءيا، ونداي جوسپار بار. ەندى رەسپۋبليكا كۇنىندە استانالىق 60 قالامگەرگە 500 مىڭ تەڭگەنىڭ سەرتيفيكاتىن بەرەمىز دەپ وتىرمىز. ەندى وسى ازاماتتار ءتىل باسقارماسى ارقىلى سەرتيفيكات الاتىن بولادى.

-25 جاس قالامگەر قالاي تاڭداپ الىندى؟

-25 ۇزدىك جاس قالامگەر كونكۋرستىق نەگىزدە انىقتالدى. ولار استانا تۋرالى شىعارما جىبەردى. كونكۋرستاردا ۇزدىك اتانعاندار تاڭداپ الىندى.

-سىياقى اكىمدىكتىڭ بيۋدجەتىنەن ءبولىندى مە؟

-ءيا، استانا قالاسى اكىمدىگىنىڭ بيۋدجەتىنەن ءبولىندى.

7 شىلدەدە جاستار تەاترىندا ەلوردالىق «ۇزدىك جاس قالامگەر» ادەبي شاراسىن وتكىزدىك. استانادا تۇراتىن 25 جاستىڭ قاناتىنا دەم بەرىپ، تالابىن شىڭدادىق. قالا اكىمىنە، جاستار ساياساتى ماسەلەلەرى باسقارماسىنىڭ باسشىسى قايرات قامباروۆ باۋىرىما قالامگەرلەر اتىنان العىس ايتامىن. استانا تاريحىندا جاس قالامگەرلەرگە جاسالعان تۇڭعىش قامقورلىق جىلدا جالعاسىن تاپسا دەيمىن. ەلىمىزدىڭ بايراقتى بايتاعى جاساي بەرسىن!

-راحمەت، ىسكە ءسات!

اڭگىمەلەسكەن داستان كەنجالين،

استانا