Dáýletkereı Kápuly: «Respýblıka kúninde taǵy 60 qalamgerge syıaqy beremiz»

Jaqynda Astanada qala kúni qarsańynda elorda ákimdigi men Qazaqstan Jazýshylar odaǵynyń Astana qalalyq fılıalynyń qoldaýymen ótken «Astana – shabyt arqaýy» atty mádenı is-sharasynda astanalyq 80 qalamger, odan keıin 25 jas aqyn-jazýshy 500 myń teńge kóleminde sertıfıkat alǵan bolatyn. Endi Qazaqstan Jazýshylar odaǵynyń hatshysy, Astana qalalyq fılıalynyń dırektory Dáýletkereı Kápulynyń aıtýynsha, Respýblıka kúninde taǵy 60 adamǵa 500 myń teńgeniń sertıfıkaty tapsyrylady. Sóıtip, Astanadaǵy Jazýshylar odaǵyna múshe 165 adam aqshalaı syıaqy alatyn bolady.

-Dáýletkereı Kápuly, astanalyq qalamgerlerge aqshalaı sertıfıkat tapsyrǵandaryńyz jaqsy is bolǵan eken. Bul kimniń bastamasy, ıdeıasy?

-Bul ıdeıa meniki. Biz Almatydaǵy qalamgerlerdi úsh jyl qatarynan marapattap kelemiz. Osyny nege Astanada jasamasqa dep qala ákimdigine habarlasyp, aıttym. Buǵan deıin eki jyl qatarynan burynǵy qala ákimine aıtyp keldim. Ákimdiktiń tabaldyryǵyn tozdyryp, qala ákimine qaıta-qaıta aıtyp júrdim. Endi mine, Astanaǵa jańa ákim kelgennen keıin másele sheshildi. Qala ákimi 20 kúnnen keıin qabyldap, máseleni kóp sózge kelmeı sheship berdi.

-Jaqsy bolǵan eken. Astana kúni qarsańynda neshe adam aqshalaı syıaqy aldy?

-Barlyǵy 105 adam aldy. Onyń ishinde aǵa býyn ókilderinen 80 adam alsa, 25 jas qalamgerge setıfıkatpen tapsyryldy. Qalamgerge mundaı qurmet Astana tarıhynda buryn-sońdy bolmaǵan. Tuńǵysh ret boldy. Osy jerde men 80 qalamgerdiń sertıfıkat alýyna úles qosqan  Mádenıet basqarmasynyń basshysy Jańabaı Meıirmanqulovqa da alǵys aıtamyn.

Jalpy, Astana astana bolǵaly osy qalada turyp kele jatqan qalamgerlerdiń, onyń ishinde aǵa býynnyń, «Astana – arman qala» dep alyp ushyp jetetin jas qalamgerlerdiń Astanada rýhanı orta qalyptastyrýda, qalanyń ádebı áleýetin kóterýde eńbegi zor.  Astana tek qana ákimshilik, saıası, qarjylyq ortalyq emes, rýhanı ortalyqqa aınalyp keledi. Mysaly, Qalamgerler alleıasy, Jazýshylar úıi, Jýrnalıster saıabaǵy ashyldy. Osynyń bári ákimdiktiń qoldaýymen jasalynǵan ıgi-shara.

-Aldaǵy ýaqytta Jazýshylar odaǵynyń múshelerine taǵy syıaqy beresizder me?

-Iá, ondaı jospar bar. Endi Respýblıka kúninde astanalyq 60 qalamgerge 500 myń teńgeniń sertıfıkatyn beremiz dep otyrmyz. Endi osy azamattar Til basqarmasy arqyly sertıfıkat alatyn bolady.

-25 jas qalamger qalaı tańdap alyndy?

-25 úzdik jas qalamger konkýrstyq negizde anyqtaldy. Olar Astana týraly shyǵarma jiberdi. Konkýrstarda úzdik atanǵandar tańdap alyndy.

-Syıaqy ákimdiktiń bıýdjetinen bólindi me?

-Iá, Astana qalasy ákimdiginiń bıýdjetinen bólindi.

7 shildede Jastar teatrynda elordalyq «Úzdik jas qalamger» ádebı sharasyn ótkizdik. Astanada turatyn 25 jastyń qanatyna dem berip, talabyn shyńdadyq. Qala ákimine, Jastar saıasaty máseleleri basqarmasynyń basshysy Qaırat Qambarov baýyryma qalamgerler atynan alǵys aıtamyn. Astana tarıhynda jas qalamgerlerge jasalǵan tuńǵysh qamqorlyq jylda jalǵasyn tapsa deımin. Elimizdiń baıraqty baıtaǵy jasaı bersin!

-Rahmet, iske sát!

Áńgimelesken Dastan KENJALIN,

ASTANA