مىرزاعالي ايتجانوۆ: «بوكسشىلار بىزگە دەيىن ەرەجە ساقتاماعان»

 بوكستان قازاقستان ۇلتتىق قۇراما كومانداسىنىڭ باس جاتتىقتىرۋشىسى مىرزاعالي ايتجانوۆ بوكسشىلار ءساماتالى تولتاەۆ پەن ابزال سەرىكتىڭ تىيىم سالىنعان پرەپاراتتاردى قولدانعانىنا بايلانىستى پىكىر ءبىلدىردى.

-بۇل ءوزى بۇرىن بولعان جاعداي. نەگە دەسەڭىز، تىيىم سالىنعان پرەپاراتتار ادامنىڭ ازعاسىندا 3-4 اي، كەيدە ءبىر جىلعا دەيىن بولادى. قاڭتار ايىندا ۇلتتىق دوپينگكە قارسى ورتالىعى ءساماتالى تولتاەۆ پەن  ابزال سەرىكتى دوپينگكە تەكسەرگەندە ولار سىنامادان وتە الماعان، — دەپ باستادى ءسوزىن باس جاتتىقتىرۋشى.

-ءسىز ۇلتتىق قۇرامانىڭ باس جاتتىقتىرۋشىسى بولىپ وسى جىلدىڭ باسىندا تاعايىندالعان ەدىڭىز. دەمەك، سىزگە دەيىن بولعان عوي.

-ءيا، سولاي بولىپ تۇر. بىزگە دەيىن بولعان. ول كەزدە ۇلتتىق قۇرامادا عىلىمي توپ بولماعان. سپورتشىلار ەرەجەنى ساقتاماي جۇرە بەرگەن. ءوزىم بىلەمىن دەپ جۇرگەن. ۇيدە ۆيتامين ىشسە، ول جارتى جىلدان كەيىن، كەيدە ءبىر جىلدان كەيىن ادام اعزاسىنان شىعادى.

-ال قازىر ۇلتتىق قۇراماداعى جاعداي قالاي؟

-قازىر ءبىز ءبارىن وزگەرتتىك. بوكسشىلارعا تىيىم سالىنعان ءدارى-دىرمەكتەر، ۆيتاميندەر ىشپەڭدەر دەپ ايتامىز. ەسكەرتەمىز. ەڭ الدىمەن ەسكەرتەمىز. ۇلتتىق قۇرامانىڭ دارىگەرى يرەك ساتوۆ ەسكەرتۋ جاسايدى، عىلىمي توپتىڭ باسشىسى عاليا بيليالوۆا سپورتشىلارمەن سەمينار وتكىزەدى. سوسىن بوكسشىلار وقۋ-جاتتىعۋ جيىندارىندا دوپينگكە تەكسەرىلەدى. ولارعا تاعى دا ەسكەرتۋ جاسالادى.

قازىر بوكسشىلار دەمالىستى. دەمالىستا دا ولارعا تىيىم سالىنعان زاتتاردى ىشپەڭدەر دەپ ەسكەرتۋ جاسايمىز.

-الدا قانداي جوسپار بار؟

-الدا تۇركياعا ون كۇنگە بارامىز. وسى شىلدە ايىندا جول جۇرەمىز. تۇركيادا بوكسشىلار وزدەرىنە قايتا قالپىنا كەلۋ ءۇشىن جيىنىن وتكىزەمىز. ولار تەڭىزدە شومىلىپ، دەنەسىن قاتايتادى. ودان كەيىن «اقبۇلاق» وليمپيادالىق ورتالىقتاعى وقۋ-جاتتىعۋ جيىنىنا قاتىسامىز. سوسىن الماتىداعى تاۋلاردا دايىندالامىز. سودان كەيىن تۇركىستان وبلىسىنداعى «الما-تاۋ» بازاسىندا ازيا ويىندارىنا دايىندىقتى باستايمىز. ازيا ويىندارىنا قۇرامادا وزگەرىس بولادى. ازياداعا ەكى قۇراممەن دايىندالامىز.

-مالىمەتتى ناقتىراپ بەرگەنىڭىزگە راحمەت!

بۇعان دەيىن حابارلانعانداي، 2022 جىلعى ازيا چەمپيوناتىنىڭ قولا جۇلدەگەرى ءساماتالى تولتاەۆ انابوليكالىق ستەرويد بولىپ تابىلاتىن ورالتۋرينابولدى قولدانعانى ءۇشىن 2026 جىلدىڭ 31 ناۋرىزىنا دەيىن سپورتتان شەتتەتىلدى.

تاعى بوكسشى  ابزال سەرىكتىڭ اعزاسىنان مەتاستەرون انىقتالدى. سوندىقتان ول 2026 جىلدىڭ 7 ساۋىرىنە دەيىن ديسكۆاليفيكاتسيا الدى.

ەسكە سالا كەتسەك، 2023 جىلى 22 جاسقا دەيىنگىلەر اراسىندا بانگكوكتا وتكەن ازيا چەمپيوناتىندا ابزال سەرىك كۇمىس مەدال يەگەرى اتانعان بولاتىن.

اڭگىمەلەسكەن داستان كەنجالين،

استانا