Myrzaǵalı Aıtjanov: «Boksshylar bizge deıin ereje saqtamaǵan»

 Bokstan Qazaqstan ulttyq qurama komandasynyń bas jattyqtyrýshysy Myrzaǵalı Aıtjanov boksshylar Samatáli Tóltaev pen Abzal Seriktiń tyıym salynǵan preparattardy qoldanǵanyna baılanysty pikir bildirdi.

-Bul ózi buryn bolǵan jaǵdaı. Nege deseńiz, tyıym salynǵan preparattar adamnyń azǵasynda 3-4 aı, keıde bir jylǵa deıin bolady. Qańtar aıynda Ulttyq dopıngke qarsy ortalyǵy Samatáli Tóltaev pen  Abzal Serikti dopıngke teksergende olar synamadan óte almaǵan, — dep bastady sózin bas jattyqtyrýshy.

-Siz ulttyq quramanyń bas jattyqtyrýshysy bolyp osy jyldyń basynda taǵaıyndalǵan edińiz. Demek, sizge deıin bolǵan ǵoı.

-Iá, solaı bolyp tur. Bizge deıin bolǵan. Ol kezde ulttyq quramada ǵylymı top bolmaǵan. Sportshylar erejeni saqtamaı júre bergen. О́zim bilemin dep júrgen. Úıde vıtamın ishse, ol jarty jyldan keıin, keıde bir jyldan keıin adam aǵzasynan shyǵady.

-Al qazir ulttyq quramadaǵy jaǵdaı qalaı?

-Qazir biz bárin ózgerttik. Boksshylarǵa tyıym salynǵan dári-dirmekter, vıtamınder ishpeńder dep aıtamyz. Eskertemiz. Eń aldymen eskertemiz. Ulttyq quramanyń dárigeri Irek Satov eskertý jasaıdy, ǵylymı toptyń basshysy Ǵalııa Bılıalova sportshylarmen semınar ótkizedi. Sosyn boksshylar oqý-jattyǵý jıyndarynda dopıngke tekseriledi. Olarǵa taǵy da eskertý jasalady.

Qazir boksshylar demalysty. Demalysta da olarǵa tyıym salynǵan zattardy ishpeńder dep eskertý jasaımyz.

-Alda qandaı jospar bar?

-Alda Túrkııaǵa on kúnge baramyz. Osy shilde aıynda jol júremiz. Túrkııada boksshylar ózderine qaıta qalpyna kelý úshin jıynyn ótkizemiz. Olar teńizde shomylyp, denesin qataıtady. Odan keıin «Aqbulaq» olımpıadalyq ortalyqtaǵy oqý-jattyǵý jıynyna qatysamyz. Sosyn Almatydaǵy taýlarda daıyndalamyz. Sodan keıin Túrkistan oblysyndaǵy «Alma-Taý» bazasynda Azııa oıyndaryna daıyndyqty bastaımyz. Azııa oıyndaryna quramada ózgeris bolady. Azıadaǵa eki qurammen daıyndalamyz.

-Málimetti naqtyrap bergenińizge rahmet!

Buǵan deıin habarlanǵandaı, 2022 jylǵy Azııa chempıonatynyń qola júldegeri Samatáli Tóltaev anabolıkalyq steroıd bolyp tabylatyn oraltýrınaboldy qoldanǵany úshin 2026 jyldyń 31 naýryzyna deıin sporttan shettetildi.

Taǵy boksshy  Abzal Seriktiń aǵzasynan metasteron anyqtaldy. Sondyqtan ol 2026 jyldyń 7 sáýirine deıin dıskvalıfıkaııa aldy.

Eske sala ketsek, 2023 jyly 22 jasqa deıingiler arasynda Bangkokta ótken Azııa chempıonatynda Abzal Serik kúmis medal ıegeri atanǵan bolatyn.

Áńgimelesken Dastan KENJALIN,

ASTANA