سەيدىلدا بايشاقوۆ ومىردەن ءوتتى

بۇگىن 73 جاسىنا قاراعان شاعىندا بەلگىلى فۋتبولشى سەيدىلدا بايشاقوۆ ومىردەن ءوتتى.

سەيدىلدا يكرام ۇلى 1950 جىلى 28 تامىزدا تاراز قالاسىندا تۋعان.

1968 جىلى «ەنەرگەتيك» كلۋبىندا وينادى. 1969 جىلى قازاق كسر چەمپيوناتىندا تۇڭعىش رەت الاڭعا شىقتى. 28 ساۋىردە پاۆلوداردىڭ «تراكتور» كومانداسىمەن ماتچقا قاتىستى.

1971 جىلى الماتىنىڭ «قايرات» كلۋبىنا اۋىستى. 27 ناۋرىزدا ۆوروشيلوۆ قالاسىنىڭ «زاريا» كلۋبىنا قارسى كسرو كۋبوگىندا تۇڭعىش رەت «قايراتتىقتاردىڭ» قاقپاسىن قورعادى. وسى ويىننان 12 كۇن وتكەن سوڭ لەنينگرادتىڭ «زەنيت» كومانداسىنا قارسى ويىندا تۇڭعىش رەت كسرو چەمپيوناتىنىڭ جوعارى ليگاسىندا الاڭعا شىقتى. ماۋسىم بىتكەنشە 29 ماتچتا الاڭعا شىقتى.

تۇڭعىش گولىن 1972 جىلى 2 تامىزدا سكا (دونداعى روستوۆ) قاقپاسىنا سالدى. بۇل ويىن 1:1 ەسەبىمەن تەڭ اياقتالدى. ۇزاماي كلۋبتىڭ كاپيتانى بولىپ تاعايىندالدى. بايشاقوۆ «قايراتتىڭ» كاپيتانى بولىپ مانسابىن اياقتاعانشا اتقاردى.

1977 جىلى كسرو قۇراماسى ساپىندا ەكى ويىندا الاڭعا شىقتى. تۇڭعىش ويىنىن 30 ساۋىردە ۆەنگرياعا قارسى وتكىزدى. ودان كەيىن 10 مامىردا گرەكيا قۇراماسىمەن وينادى. ەكى ماتچتا دا سەيىلدا بايشاقوۆ 90 مينۋتتى تولىق وينادى.

بىراق بۇدان كەيىن قۇراماعا قايتا شاقىرىلمادى.

سەيدىلدا بايشاقوۆ «قايرات» ساپىنداعى ەڭ سوڭعى ويىنىن 1981 جىلى 4 ساۋىردە «تاۆرياعا» قارسى وتكىزدى. بۇل ويىندا ەسەپ اشىلمادى. سوڭعى گولىن سول جىلى 26 ناۋرىزدا ماسكەۋدىڭ «تورپەدو» كلۋبىنىڭ قاقپاسىنا سالدى. بۇل ونىڭ كسرو چەمپيوناتتارىنداعى 11-گولى بولدى.

فۋتبولمەن قوشتاسقان سوڭ كەلەسى جىلى «قايراتتىڭ» باس جاتتىقتىرۋشىسى بەتسا يوجەفتىڭ كومەكشىسى قىزمەتىنە تاعايىندالدى. بۇل قىزمەتتى 1988 جىلعا دەيىن اتقاردى.

2007 – 2016 جىلدار ارالىعىندا قازاقستان فۋتبول فەدەراتسياسىنىڭ ۆيتسە-پرەزيدەنتى بولدى. ودان كەيىن فەدەراتسيانىڭ پرەزيدەنتى قىزمەتىن اتقاردى.

سەيدىلدا يكرام ۇلى 2020 جىلى پرەزيدەنتتىڭ جارلىعىمەن «پاراسات» وردەنىمەن، «قازاقستان رەسپۋبليكاسىنىڭ 25 جىلى» مەرەيتويلىق مەدالىمەن ماراپاتتالعان.