تۇركىستاندا ازيا ويىندارىنا باراتىن تاەكۆوندوشىلار انىقتالدى (فوتو)

تۇركىستان قالاسىنداعى وليمپييالىق ورتالىقتا تاەكۆوندودان (WT) ەرەسەكتەر اراسىندا قازاقستان كۋبوگى اياقتالدى.

مادەنيەت جانە سپورت مينيسترلىگى سپورتتى دامىتۋ ديرەكتسياسىنىڭ حابارلاۋىنشا، بيىل جاڭا پىشىندە وتكەن باسەكەدە 10 سالماقتا (ەرلەر 5، ايەلدەر 5) چەمپيون انىقتالدى. اۋەلى ەكى كۇن بويى ءار سالماقتا چەمپيون انىقتاۋ ءۇشىن جارىس بولدى. سوسىن سپورتشىلار تاعى بىرنەشە كۇن بويى ءوز سالماعىن ۇستاپ تۇرىپ، شەشۋشى كۇنى شيرەك فيناليستەر اراسىنان توپ جارعان سپورتشىمەن سۋپەرفينالدا ايقاستى. وسى جەكپە-جەكتە باسىم تۇسكەنى ەلىمىزدىڭ نامىسىن ازيا ويىندارىندا قورعاۋعا مۇمكىندىك الدى.

قازاقستان كۋبوگىن يەلەنگەن تاەكۆوندوشىنىڭ ءبىرى نۇربەك عازەزدىڭ ايتۋىنشا، تارازىنىڭ باسىندا ازيا ويىندارىنا بەرىلەتىن جولداما تۇرعاندىقتان ەشكىم ايانعان جوق.

كەشەلى بەرى جاتتىقتىرۋشىم ەكەۋمىز سۋپەرفينالعا دايىندالدىق. ەلجان ەكەۋمىز ءبىر قالانىڭ سپورتشىسىمىز. جوسپار قارسىلاستىڭ كىم بولاتىنان قاراماي ەكى راۋند بار كۇشىمدى سالىپ، ايقاسۋ بولدى. تارازىنىڭ باسىندا ازيا ويىندارىنا بەرىلەتىن جولداما تۇرعاندىقتان ەشكىم ايانىپ جاتقان جوق. ونىڭ ۇستىنە ءبىزدىڭ سالماققا اۋىسقان باسقا تاەكۆوندوشىلار بار. ەندى حالىقارارالىق جارىسقا مىقتاپ دايىندالامىز، — دەدى ول.

سونداي-اق كۇزدە ازيا ويىندارىنا قاتىسۋشى ءار مەملەكەتتەن ءبىر تورەشى شاقىرىلادى. بيىل قازاقستان اتىنان قۇرلىق دوداسىنا حالىقارالىق دارەجەدەگى تورەشى داۋرەن العاباەۆ بارادى.

جاڭا پىشىندە وتكەن بيىلعى قازاقستان كۋبوگى تورەشىلەرگە قيىن، تاڭسىق بولدى دەي المايمىن. بىزگە ەمەس، سپورتشىلار ءۇشىن ءبارى جاڭادان باستالدى. وسى فورماتتىڭ ماقساتى – تاەكۆوندوشىلاردىڭ كوپ سالماق قۋىنىڭ الدىن الۋ. مۇنىڭ حالىقارالىق جارىستار كەزىندە كەرى اسەر ەتەتىنىن ءجيى ايتىپ ءجۇرمىز. مەنىڭشە، وسى تاجىريبەنى ەرەسەكتەرمەن قوسا جاستار اراسىنداعى جارىستاردا قولدانۋ كەرە، — دەپ ايتتى بيىلعى قازاقستان كۋبوگىنىڭ باس تورەشىسى داۋرەن العاباەۆ.

بيىلعى باسەكەدە جالپى ەسەپتە الماتى قالاسىنىڭ كومانداسى توپ جارسا، اتىراۋ وبلىسى ەكىنشى، جامبىل وبلىسى ءۇشىنشى ورىن الدى.

ال تومەندە اتتارى كورسەتىلگەن تاەكۆوندوشىلار ەل كۋبوگىن يەلەندى:

ايەلدەر:

49 كگ – بوتاكوز قاپانوۆا (قىزىلوردا)

53 كگ – ازيزا قاراجانوۆا (جامبىل وبلىسى)

57 كگ – ماريا سەۆوستيانوۆا (اتىراۋ)

67 كگ – نۇراي قۇسايىنوۆا (اتىراۋ وبلىسى)

+67 كگ – جانسەل دەنيز (الماتى قالاسى)

ەرلەر:

58 كگ – ەلدوس ىسقاق (جامبىل وبلىسى)

63 كگ – نۇربەك عازەز (الماتى قالاسى)

68 كگ – ەلدار ءبىرىمباي (ماڭعىستاۋ وبلىسى)

80 كگ – نۇرلان مىرزاباەۆ (تۇركىستان وبلىسى)

+80 كگ – سمايىل دۇيسەباي (تۇركىستان وبلىسى).

 

شامكەن بايىربەك،

استانا

فوتو: مادەنيەت جانە سپورت مينيمترلىگىنىڭ سپورتتى دامىتۋ ديرەكتسياسى