ماتچقا جاقسى دايىندالدىق – ابات ايىمبەتوۆ (ۆيدەو)

بۇگىن تۇندە استانا ۋاقىتىمەن ساعات 00.00-دە «استانا» كلۋبى ۋەفا چەمپيوندار ليگاسىنىڭ ەكىنشى ىرىكتەۋ كەزەڭى اياسىندا سىرت الاڭدا حورۆاتيانىڭ «دينامو» كومانداسىمەن كەزدەسەدى. بۇل ماتچ زاگرەبتەگى «ماسيمير» ستاديونىندا بولادى.

كەشە زاگرەبتە «استانا» كلۋبى جاتتىعۋ جاسادى. ونىڭ الدىندا كوماندانىڭ شابۋىلشىسى ابات ايىمبەتوۆ كلۋبپەن بىرگە حورۆاتياعا بارعان باق وكىلدەرىنىڭ سۇراقتارىنا جاۋاپ بەردى.

-«دينامو» كلۋبىمەن ماتچ قيىن بولا ما؟

-ارينە، قيىن ماتچ بولادى. ءبىز ويىنعا دايىنبىز. ەلگە جاقسى كوڭىل كۇيدە قايتامىز دەپ ويلايمىن.

-زاگرەبكە قانداي كوڭىل-كۇيمەن كەلدىڭدەر؟

— «دينامو» — جىل سايىن ەۋروكۋبوكقا تۇراقتى قاتىسىپ جۇرگەن كوماندا. ءار جىلى توپتىق كەزەڭدە وينايدى. ولاردا ۇلتتىق قۇرامادا وينايتىن فۋتبولشى كوپ. جالپى، «دينامو» جاقسى كوماندا.

-ماتچتان نە كۇتۋگە بولادى؟

-ءبارىن  ويىن كورسەتەدى. تاعى دا قايتالاپ ايتامىن، ءبىز ويىنعا جاقسى دايىندالدىق.

-ابات، باسپاسوزدە استانانىڭ مۇمكىندىگى از ەكەنى ايتىلىپ جاتىر. بۇل تۋرالى نە ايتار ەدىڭ؟

— ءبىز «ديناموعا» قۇرمەتپەن قارايمىز. ال «استانانىڭ» مۇمكىندىگى از دەگەن پىكىر تۋرالى ايتار بولسام، مەن ونىمەن كەلىسپەيمىن. ءبىزدىڭ ويىمىز دا ويىنىمىز دا باسقاشا. مەن ءوز كومانداما سەنەمىن. اۋەلى قۇدايعا سەنەمىز، سوسىن ءبارىن كوماندانىڭ ويىنى كورسەتەدى. جانكۇيەردى جاقسى ناتيدەمەن قۋانتامىز دەپ ويلايمىن.

ەسكە سالا كەتسەك، «استانا» چەمپيوندار ليگاسىنىڭ ىرىكتەۋ تۋرنيرىنە قاتىسىپ جاتىر. كوماندا ءبىرىنشى ىرەكتەۋ كەزەڭىندە ءتبيليسيدىڭ «دينامو» كلۋبىمەن كەزدەسىپ، ونىمەن ءبىرىنشى ماتچتا ءوز الاڭىندا 1:1 ەسەبىمەن تەڭ ويناپ،  ەكىنشى ويىندا 2:1 ەسەبىمەن جەڭىپ، كەلەسى كەزەڭگە شىققان بولاتىن.

ەندى «استانا» بۇگىن تۇندە زاگرەبتەگى ويىننان كەيىن  قارسىلاسىمەن 2 تامىزدا «استانا ارەنا» ستاديونىندا كەزدەسەدى.