Matchqa jaqsy daıyndaldyq – Abat Aıymbetov (VIDEO)

Búgin túnde Astana ýaqytymen saǵat 00.00-de «Astana» klýby ÝEFA Chempıondar lıgasynyń ekinshi irikteý kezeńi aıasynda syrt alańda Horvatııanyń «Dınamo» komandasymen kezdesedi. Bul match Zagrebtegi «Masımır» stadıonynda bolady.

Keshe Zagrebte «Astana» klýby jattyǵý jasady. Onyń aldynda komandanyń shabýylshysy Abat Aıymbetov klýbpen birge Horvatııaǵa barǵan BAQ ókilderiniń suraqtaryna jaýap berdi.

-«Dınamo» klýbymen match qıyn bola ma?

-Árıne, qıyn match bolady. Biz oıynǵa daıynbyz. Elge jaqsy kóńil kúıde qaıtamyz dep oılaımyn.

-Zagrebke qandaı kóńil-kúımen keldińder?

— «Dınamo» — jyl saıyn eýrokýbokqa turaqty qatysyp júrgen komanda. Ár jyly toptyq kezeńde oınaıdy. Olarda ulttyq quramada oınaıtyn fýtbolshy kóp. Jalpy, «Dınamo» jaqsy komanda.

-Matchtan ne kútýge bolady?

-Bárin  oıyn kórsetedi. Taǵy da qaıtalap aıtamyn, biz oıynǵa jaqsy daıyndaldyq.

-Abat, baspasózde Astananyń múmkindigi az ekeni aıtylyp jatyr. Bul týraly ne aıtar ediń?

— Biz «Dınamoǵa» qurmetpen qaraımyz. Al «Astananyń» múmkindigi az degen pikir týraly aıtar bolsam, men onymen kelispeımin. Bizdiń oıymyz da oıynymyz da basqasha. Men óz komandama senemin. Áýeli Qudaıǵa senemiz, sosyn bárin komandanyń oıyny kórsetedi. Jankúıerdi jaqsy nátıdemen qýantamyz dep oılaımyn.

Eske sala ketsek, «Astana» Chempıondar lıgasynyń irikteý týrnırine qatysyp jatyr. Komanda birinshi irekteý kezeńinde Tbılısıdiń «Dınamo» klýbymen kezdesip, onymen birinshi matchta óz alańynda 1:1 esebimen teń oınap,  ekinshi oıynda 2:1 esebimen jeńip, kelesi kezeńge shyqqan bolatyn.

Endi «Astana» búgin túnde Zagrebtegi oıynnan keıin  qarsylasymen 2 tamyzda «Astana Arena» stadıonynda kezdesedi.