قازاقستان دوپينگپەن كۇرەستى قاتاڭداتادى

پولشانىڭ كاتوۆيتسە قالاسىندا مادەنيەت جانە سپورت ۆيتسە-ءمينيسترى ەلدوس رامازانوۆ باستاعان دەلەگاتسيا WADA ۇيىمىنىڭ باس ديرەكتورى  وليۆەر نيگگلەمەن جانە وسى مەكەمەنىڭ ازيا وڭىرىندەگى كەڭسەسىنىڭ باسشىسى  كازۋحيرو حاياشيمەن كەزدەستى. بۇل تۋرالى مادەنيەت جانە سپورت مينيسترلىگى سپورت جانە دەنەشىنىقتىرۋ ىستەرى كوميتەتىنىڭ ءباپاسوز قىزمەتى حابارلادى.

كەزدەسۋ سپورتتاعى دوپينگ ماسەلەسىنە ارنالعان V بۇكىلالەمدىك دوپينگكە قارسى كونفەرەنتسيا اياسىندا ءوتتى. قازاقستاندىق تاراپ دوپينگكە قارسى ەرەجەلەردى بۇزعانى ءۇشىن جاۋاپكەرشىلىكتى قاتاڭداتۋ، ۇلتتىق دوپينگكە قارسى ۇيىمنىڭ مارتەبەسىن ارتتىرۋ سەكىلدى ماسەلەلەردى قامتيتىن زاڭ جوباسى تۋرالى كەڭىنەن ايتىپ بەردى. ءوز كەزەگىندە، نيگگلە مىرزا قازاقستان ۇكىمەتىنىڭ رەفورمالارىن باس بارماقپەن باعالاپ، بولاشاقتا دوپينگپەن كۇرەس ماسەلەسىندە ىنتىماقتاستىقتىڭ نىعاياتىنىنا سەنىم ءبىلدىردى.

ەستەرىڭىزگە سالايىق، دەنە شىنىقتىرۋ جانە سپورتقا قاتىستى زاڭ جوباسى ءماجىلىستىڭ ەكىنشى وقىلىمىندا ماقۇلدانىپ، پارلامەنت سەناتىنىڭ قاراۋىنا جىبەرىلگەن بولاتىن.

ءوز كەزەگىندە، كازۋحيرو حاياشي دوپينگ-سىنامالاردىڭ ساقتالۋى جۇيەسىنىڭ رەفورمالانىپ جاتقانىن ايتا كەتتى.

«وليمپيادا ويىندارىنا دەيىن الىنعان دوپينگ سىنامالار بولاشاقتا 10 جىل ساقتالاتىن بولادى. بۇل دوپينگ-سىنامالاردى ساقتاۋ مەن ولاردى قايتادان ساراپتامادان وتكىزۋدىڭ الەمدىك باعدارلاماسى بولادى»،-دەدى حاياشي.

سونىمەن قاتار قوس تاراپ دوپينگكە قارسى كودەكس پەن حالىقارالىق دوپينگكە قارسى تالاپتاردىڭ قايتا قارالۋ ماسەلەسىن تالقىلادى. جاڭا حالىقارالىق ستاندارتقا سۇيەنسەك، قانداي دا ءبىر ەلدىڭ دوپينگكە قارسى اگەنتتىگى حالىقارالىق كودەكسكە ساي كەلمەيتىن بولسا، سول ەلدىڭ سپورتشىسى جارىستان شەتتەتىلەدى، ونىڭ قاتارىندا وليمپيادا ويىندارى دا بار.

ەستەرىڭىزگە سالا كەتەيىك، 2017 جىلعى جەلتوقسان ايىندا  WADA ۇيىمى دوپينگكە قارسى كودەكس پەن حالىقارالىق دوپينگكە قارسى ستاندارتتاردى قايتا قاراۋ پروتسەسىن باستاعان بولاتىن.  سودان بەرى 2000 تۇزەتۋلەر ەنگىزىلىپ، ءبىرشاما وزگەرگەن قۇجاتتى زاڭگەرلەر ساراپتاۋدان وتكىزگەن ەدى. 2017 جىلدان بەرى قارالىپ كەلە جاتقان وزگەرىستەر پولشاداعا كونفەرەنتسيانىڭ دا باستى تاقىرىپتارىنىڭ ءبىرى بولادى.

پولشانىڭ كاتوۆيتسە قالاسىندا سپورتتاعى دوپينگ ماسەلەلەرىنە ارنالعان V بۇكىلالەمدىك دوپينگكە قارسى كونفەرەنتسيا 5 قاراشادان بەرى ءوتىپ كەلەدى . وعان الەمنەن 1000-نان استام دەلەگات قاتىسىپ جاتىر. كۇن تارتىبىندە – دوپينگپەن كۇرەس ماسەلەسى. سونداي-اق، كونفەرەنتسيا بارىسىندا پولشانىڭ سپورت جانە تۋريزم ءمينيسترى  ۆيتولد بانكا بۇكىلالەمدىك دوپينگكە قارسى اگەنتتىك  ۇيىمىنىڭ (WADA) باسشىسىنا تاعايىندالادى.