جاس تالانتتاردى تانىتاتىن تۋرنير جالعاسىن تاپتى

26 ماۋسىم – حالىقارالىق ناشاقورلىق  جانە ەسىرتكى ساۋداسىنا قارسى كۇرەس كۇنى. اتاۋلى كۇنگە وراي  قالالىق   الماتى قالالىق پوليتسيا دەپارتامەنتى ەسىرتكى قىلمىسىنا قارسى  ءىس-قيمىل باسقارماسى جانە كەڭەس وداعىنىڭ باتىرى ساعادات نۇرماعامبەتوۆ اتىنداعى «Sagadat Batyr»  سپورت كلۋبى،  الماتى قالالىق گرەپپلينگ فەدەراتسياسى (AIGA)، «Qazaqstan Ardagerleri» قاۋىمداستىعى بىرلەسىپ اۋقىمدى چەمپيونات وتكىزدى. بالالار مەن جاسوسپىرىمدەر اراسىندا گرەپپلينگتىڭ AIGA كۇرەسى بويىنشا وتكىزىلگەن اشىق چەمپيوناتتا الماتى قالاسىنىڭ جەتكىنشەكتەرى عانا ەمەس، نۇر-سۇلتان قالاسى، قىزىلوردا، جامبىل، پاۆلودار، الماتى  وبلىسىنان دا جاس سپورتشىلار قاتىسىپ، شەبەرلىكتەرىن سىناپ كوردى.

پارلامەنت ءماجىلىسىنىڭ دەپۋتاتى، «Qazaqstan Ardagerleri» قاۋىمداستىعىنىڭ توراعاسى باقىتبەك سماعۇل بۇنداي جارىستاردىڭ ءجيى ۇيىمداستىرىلۋى جاس سپورتشىلاردىڭ شىڭدالۋىنا سەرپىن بەرەتىنىن ايتىپ،  بۇگىنگى بەلدەسۋگە تۇسەتىن سپورتشىلاردىڭ ىشىنەن ەرتەڭگى وليمپيادا ويىندارىنىڭ جەڭىمپازى، الەم چەمپيوندارىنىڭ ءوسىپ شىعاتىنىنا سەنىم ءبىلدىردى.  الماتى قالالىق پوليتسيا دەپارتامەنتى ەسىرتكى قىلمىسىنا قارسى  ءىس-قيمىل باسقارماسى باستىعىنىڭ ورىنباسارى، پوليتسيا پودپولكوۆنيگى تولەۋ  مارحامەدوۆ حالىقارالىق ناشاقورلىق  جانە ەسىرتكى ساۋداسىنا قارسى كۇرەس كۇنىنە وراي 2019 جىلى دا وسىنداي تۋرنير ۇيىمداستىرىلعانىن، قالالىق باسقارما مەن «Sagadat Batyr»  سپورت كلۋبىنىڭ تىزە قوسىپ ۇيىمداستىرعان  سايىسقا قاتىسۋشىلاردىڭ سانى كوپ بولعانىن ايتتى. جىل سايىن ءداستۇرلى  تۇردە وتەدى دەپ جوسپارلانعان شارا بىلتىرعى پاندەميا كەزىندە توقتاپ قالعانىن، كەلەسى جىلى دا  جۇلگەسى ۇزىلمەي جالعاسىن تاباتىنىن جەتكىزدى. الماتى قالالىق گرەپپلينگ فەدەراتسياسىنىڭ پرەزيدەنتى (AIGA) اقمارال قاناتباەۆا سپورتپەن شۇعىلدانىپ، سالاۋاتتى ءومىر سالتىن ۇستاناتىن بالالاردىڭ شىمىر بولاتىنى وسى تۋرنيردە تاعى دا ايقىندالعانىن ايتتى.

چەمپيوناتتىن ۇيىمداستىرۋشىسى  «Sagadat Batyr»  سپورت كلۋبىنىڭ جەتەكشىسى، بىلىكتى باپكەر نۇرسۇلتان ورىنباساروۆ جارىستىڭ جىل وتكەن سايىن اۋقىمى كەڭەيىپ كەلە جاتقانى قۋانتادى دەيدى. «جاسوسپىرىمدەردىڭ اراسىندا جارىستىڭ ءجيى وتكەنى ولاردىڭ  كۇش-قۋاتىنىڭ قانشالىقتى تولىسقانىن كورسەتەدى.  2019 جىلى دا ەسىرتكىگە قارسى كۇرەس كۇنىنە وراي وسىنداي چەمپيوناتتى جوعارى دەڭگەيدە وتكىزدىك. بۇل جولى دا الماتى قالالىق پوليتسيا دەپارتامەنتى  ەسىرتكى قىلمىسىنا قارسى  ءىس-قيمىل باسقارماسى تاراپىنان ۇسىنىس ءتۇسىپ، ءبىز قۋانا-قۋانا وسى ءتۋرنيردى وتكىزدىك. الماتى قالاسى گرەپپلينگ فەدەراتسياسى (AIGA)، «Qazaqstan Ardagerleri» قاۋىمداستىعى مەن الماتى قالالىق دەنەشىنىقتىرۋ جانە سپورت  باسقارماسى ءبىزدىڭ ۇسىنىسىمىزدى قۋاتتاپ،  جارىستىڭ جوعارى دارەجەدە وتۋىنە وراسان  قولداۋ كورسەتتى. جىلدان-جىلعا جارىسقا قاتىسۋشىلاردىڭ قاتارى مولايىپ كەلەدى.  بۇل سالاۋاتتى ءومىر سالتىن ۇستانۋ جولىندا جاستاردىڭ بەلسەندىلىگى جوعارى ەكەنىن بايقاتسا كەرەك. ادام ومىرىنە وتە قاۋىپتى ەسىرتكى مەن ناشاقورلىقتان اۋلاق بولىپ، تۋرا جولدان تايماۋدى ناسيحاتتايتىن مۇنداي شارالاردىڭ ءجيى وتكەنى  دۇرىس. ويتكەنى بۇگىنگى  جەتكىنشەكتەردى جاسىراتىنى جوق، عالامتورداعى ءتۇرلى الەۋمەتتىك جەلىلەر مەن ءتۇرلى ويىندار تاربيەلەيدى.  الماتى قالالىق پوليتسيا دەپارتامەنتى باسشىلىعى  وسىنداي يگىلىكتى ءىس-شارالاردى وتكىزىپ، ۇرپاق ساباقتاستىعىنىڭ تاربيەسىنە كوڭىل ءبولىپ، نازار اۋدارعانى قۋانتادى. ەسىرتكى قىلمىسىنا قارسى  ءىس-قيمىل باسقارماسىنىڭ باسشىسى  الماعانبەتوۆ ەرلان داۋلەت ۇلى ءوزى باستاما كوتەرىپ، ايقىمدى ىسكە ۇيىتقى بولا ءبىلدى. وسىنداي جارىستاردىڭ ءجيى  وتۋىنە قولداۋ كورسەتكەن بارلىق اعالارىمىزعا العىس ايتامىن»، دەدى.

چەمپيوناتتىڭ جەڭىمپازدارى مەن جۇلدەگەرلەرى ۇيىمداستىرۋشىلار مەن دەمەۋشىلەردىڭ تاراپىنان ديپلوم، مەدال جانە سىيلىقتارعا كەنەلدى.

الماتى قالالىق پوليتسيا دەپارتامەنتىنىڭ باستىعى، پوليتسيا  گەنەرال-مايورى قانات تايمەردەنوۆتىڭ چەمپيوناتتىڭ ۇيىمداستىرۋشىلارى مەن باپكەرلەرگە بەرگەن  العىس حاتى سالتاناتتى تۇردە تابىستالدى. الماتى قالالىق گرەپپلينگ فەدەراتسياسىنىڭ پرەزيدەنتى (AIGA) قاناتباەۆا اقمارالعا،  چەمپيوناتتا ءادىل تورەشىلىك ەتكەن تورەشىلەردىڭ ىشىنەن  دوسجانوۆ ولجاس پەن سادىروۆ داميرگە بەرىلدى. 220-دان استام ءجاسوسپىرىم سپورتشى قاتىسقان چەمپيوناتتا شاكىرتتەرى وزا شاۋىپ، مەرەيىن ۇستەم ەتكەن باپكەرلەر كۋريلەۆ دميتري،  بالاباەۆ رۋستام،  قانايبەكوۆ دياس،  كاريەۆ دامير،  مۋراتوۆ انتونعا دا گەنەرال-مايور ق.تايمەردەنوۆتىڭ العىس حاتى تابىس ەتىلدى.

قۋان نۇردانبەك،

الماتى