Ýnıversıada: Qazaqstan hokkeıshileri jartylaı fınalda Kanadamen oınaıdy

Qysqy ýnıversıadada shaıbaly hokkeıden Qazaqstan stýdentter quramasy jartylaı fınalda Kanadamen kezdesedi.

Qazaqstan hokkeıshileri V tobynda Ońtústik Koreıa, Vengrııa, Ulybrıtanııa, Slovakııa jáne AQSh komandarymen synǵa tústi.

Toptyq kezeńde el quramasy Ońtústik Koreıany  5:1, Vengrııany 9:1, Ulybrıtanııany 15:1, Slovakııany 4:0 esebimen jeńip, AQSh quramasyna 1:4 esebimen ese jiberdi.

Osylaısha óz tobynda 12 upaımen ekinshi oryn aldy. Birinshi oryndy dál sondaı upaı jınaǵan AQSh quramasy ıelendi.

Jartylaı fınal 21 qańtarda bolady. Fınal men úshinshi oryn úshin oıyndar 22 qańtarǵa belgilengen.

Shaıbaly hokkeıden Qazaqstan stýdentter quramasy dúbirli dodaǵa toǵyz márte qatysty. 1995 jyly Ispanııanyń Haka qalasynda chempıondyq tuǵyrǵa kóterilse, 1993, 2013, 2015, 2017 jyldarda kúmis, 2007 jyly qola medal ıegeri atandy.

Dastan KENJALIN,

ASTANA