ۋنيۆەرسيادا: قازاقستان حوككەيشىلەرى جارتىلاي فينالدا كانادامەن وينايدى

قىسقى ۋنيۆەرسيادادا شايبالى حوككەيدەن قازاقستان ستۋدەنتتەر قۇراماسى جارتىلاي فينالدا كانادامەن كەزدەسەدى.

قازاقستان حوككەيشىلەرى ۆ توبىندا وڭتۇستىك كورەيا، ۆەنگريا، ۇلىبريتانيا، سلوۆاكيا جانە اقش كوماندارىمەن سىنعا ءتۇستى.

توپتىق كەزەڭدە ەل قۇراماسى وڭتۇستىك كورەيانى  5:1، ۆەنگريانى 9:1، ۇلىبريتانيانى 15:1، سلوۆاكيانى 4:0 ەسەبىمەن جەڭىپ، اقش قۇراماسىنا 1:4 ەسەبىمەن ەسە جىبەردى.

وسىلايشا ءوز توبىندا 12 ۇپايمەن ەكىنشى ورىن الدى. ءبىرىنشى ورىندى ءدال سونداي ۇپاي جيناعان اقش قۇراماسى يەلەندى.

جارتىلاي فينال 21 قاڭتاردا بولادى. فينال مەن ءۇشىنشى ورىن ءۇشىن ويىندار 22 قاڭتارعا بەلگىلەنگەن.

شايبالى حوككەيدەن قازاقستان ستۋدەنتتەر قۇراماسى ءدۇبىرلى دوداعا توعىز مارتە قاتىستى. 1995 جىلى يسپانيانىڭ حاكا قالاسىندا چەمپيوندىق تۇعىرعا كوتەرىلسە، 1993، 2013، 2015، 2017 جىلداردا كۇمىس، 2007 جىلى قولا مەدال يەگەرى اتاندى.

داستان كەنجالين،

استانا