Tulǵany eske alý týrnıri

«Jaqsy adam el yrysy, jańbyr jaýsa jer yrysy», degen eken dana halqymyz. Qazaq sportynyń damýyna zor úlesin qosqan taý tulǵaly azamattar kóp ekenin bilemiz. Solardyń ishinde basshylyq qyzmette júrip, qolynan kelgen jaqsylyǵyn qazaq sportynyń órkendeýine, keshendi ǵımarattardyń boı kóterýine súbeli úlesin qosqan iri tulǵanyń biri — Karken Ahmetuly Ahmetov dep aıtar edik.

Ol kisiniń Qazaq KSR Mınıstrler Keńesindegi Sport komıtetiniń tóraǵasy bolyp turǵan jyldary «Altyn ǵasyr» dep ataý bergen eken. Karken Ahmetulynyń tikeleı basshylyǵymen Almatyda Ortalyq stadıon, «Medeý» muz aıdynymen qosa kóptegen sport ǵımrattary salynǵanyn bireý bilse bireý bilmes. Sonymen qatar, Karken Ahmetuly tusynda sportshylar sporttyń ár túrinen kóptegen iri halyqarylyq jarystarda báıgeli bolyp, elimizdiń atyn Odaq túgili álemge tanymal etti.

Búginde Almatydaǵy Olımpıada rezerviniń respýblıkalyq mamandandyrylǵan mektep-ınternat-kolledji  keńpeıildi kemel  basshy, bilgir maman, ardaqty tulǵa,qoǵam qaıratkeri  Kárken Ahmetuly Ahmetovtyń atymen atalady. Bul mektepten aty álemge tanylǵan sportshylardyń qatary qalyń. Solardyń biri de biregeıi Olımpııa oıyndarynyń kúmis júldegeri Eldos Smetovti aıtsaq jetip jatyr.

Aıtýly mektep-ınternat kolledjdiń qabyrǵasynda áıgili tulǵanyń eske alýǵa arnalyp uıymdastyrylǵan dodaly jarystyń maqsaty da sol jas urpaqqa, altynnyń synyǵy Kárken Ahmetovtyń kim bolǵanyn eske ala otyryp jas býynnyń sportqa, elge degen kózqarasyn jaqsarta túsý bolǵan eken.

Jýyrda dzıýdo akademııasynda memleket jáne qoǵam qaıratkeri, qazaq sportynyń janashyry Kárken Ahmetuly Ahmetovty eske alýǵa arnalǵan kadetter arasynda respýblıkalyq týrnır bolyp ótti. Bul jarysty ótkizýge Mádenıet jáne sport mınıstrligi Sport jáne dene shynyqtyrý isteri komıtetiniń Kárken Ahmetov atyndaǵy Olımpıada rezerviniń respýblıkalyq mamandandyrylǵan mektep-ınternat-kolledji muryndyq boldy. Týrnırge qurmetti qonaq retinde: Kárken Ahmetovtyń tuǵan uly Nurlan Kárkenuly men dzıýdo kúresinen kóptegen sport sańlaqtaryn jattyqtyrǵan Qazaqstanǵa eńbek sińirgen jattyqtyrýshylar – Jeksenbaı Salamatov, Seıdolla Kalıev, Dúısen Aıazbekov pen Tólegen Sultanov kelip qatysty.

Jarysqa «Shańyraq» shaǵyn aýdanyndaǵy Olımpıada rezerviniń respýblıkalyq mamandandyrylǵan mektep-ınternat-kolledjimen onnan astam sport klýbynan kelgen 100-den asa tatamı sheberleri 9 salmaq dárejesi boıynsha ózara myqtyny anyqtady. Kárken Ahmetov atyndaǵy sport mektebiniń jas sportshylary bul jarysta jaqsy nátıje kórsetti. Olar 6 salmaqta 6 altyn, 1 kúmis jáne 3 qola medaldi jeńip aldy .
Sonymen altyn júldeni Gabıt Rasýlhan (46 kg), Nurasyl Pan (50 kg), Altynbek Konysbaı (55 kg), Muhametáli Jylqaıdyr (60 kg), Dıas Ihsanov (66 kg) pen Batyrhan Toqtar (+73) jeńip alsa,  jalǵyz kúmis medaldi  55 kg salmaqta Aıdyn Shúkirbek ıelendi. Al júldeli qola medalge  Marhanbet Janarys (42 kg), Qurban Orazaqynov (60 kg) pen Nurdos Dosbergen (60 kg) ıe boldy.

Jarys sońynda qadirli qonaqtarǵa estelik syılyqtar tabys etilip, jeńimpazdar men júldegerler marapattaldy. Osyndaı jarystar daryndy balýandardyń shyńdalyp ósýine zor yqpal bereri sózsiz. Aldaǵy ýaqytta bul týrnır halyqaralyq deńgeıge kóterilip jatsa, nur ústine nur bolar dep aıtar edik.

Aqyn ORDABAIULY,

ALMATY