Нысана көздеуден Қазақстан құрамасы Әлем кубогында бірінші орынды иеленді

Қазақстан құрамасы нысана көздеуден 11 медаль жеңіп алып, Әлем кубогының медальдық есебінде бірінші орынға ие болды.

Мәдениет және спорт министрлігінің хабарлауынша, нысана көздеуден Қазақстан құрамасы рейтингтік Әлем кубогында командалық бірінші орынды иеленген. Индонезия астанасы Жакартада өткен жарыста ел намысын 15 спортшы қорғады. Олар 11 медальді (3 алтын, 5 күміс, 3 қола) жеңіп алды.

Жалпы, бұл әлемдік додаға 32 елден 350 спортшы қатысты. Соның ішінде Қазақстаннан чемпиондық атаққа Никита Чирюкин мен Арина Алтухова және құрамында Александра Ле, Елизавета Безрукова, Анастасия Григорьева өнер көрсеткен әйелдер құрамасы ие болды.

Индонезиядағы Әлем кубогы рейтингтік жарыс болғандықтан, оның қорытындысы бойынша ұпайлар үлестіріліп, командалар ISSF кестесінде көтеріледі. Демек 2024 жылғы Париж Олимпиадасының лицензияларын иеленуге мүмкіндік беріледі.

Динара АМАНТАЙ,

АСТАНА