بۇگىن فۋتبولدان قازاقستان چەمپيوناتى باستالدى (ۆيدەو)

بۇگىن فۋتبولدان قازاقستان چەمپيوناتى باستالدى. پرەمەر-ليگانىڭ (بۇرىنعىشا – جوعارى ليگا، — رەد.) ءبىرىنشى ماتچى شىمكەن قالاسىندا بولدى. وندا قاجىمۇقان اتىنداعى ستاديوندا ماۋسىماشار ماتچتا جەرگىلىكتى «ورداباسى» مەن اقتاۋدىڭ «كاسپي» كوماندالارى كەزدەستى.

ويىندا 3:1 ەسەبىمەن الاڭ يەلەرى جەڭىسكە جەتتى. بيىلعى ماۋسىمنىڭ العاشقى گولىن شىمكەنت قالاسىنىڭ كومانداسىنا جاڭادان قوسىلعان باۋىرجان يسلامحان سالدى. ول ەكى جىل ۇزىلىستەن كەيىن گولدىڭ اۆتورى اتاندى. يسلامحان ماتچتىڭ 16-مينۋتىندا الىستان قارسىلاستار قاقپاسىنا قاراي بەلگىلەنگەن ايىپ دوبىنان سالدى. وسىلايشا دوپينگ داۋىنا بايلانىستى ەكى جىل ۇلكەن فۋتبولدان شەتتەتىلىپ، ورتاعا ەندى ورالىپ وتىرعان فورۆارد ءوزىنىڭ جاڭا سىناقتارعا دايىن ەكەنىن كورسەتتى.

ەكىنشى تايمنىڭ 49-مينۋتىندا جارتىلاي قورعاۋشى اسحات تاعىبەرگەن مەرگەندىك تانىتىپ، ەسەپتى 2:0-گە جەتكىزدى. ول دا ستاندارتتى جاعدايدا قاقپانى ءدال كوزدەدى. ال 65-مينۋتتا ەسەپ 3:0-گە جەتتى. بۇل جولى جاقىندا قۇرامعا الىنعان وزبەكستاندىق فۋتبولشى بوبير ابديحوليكوۆ شەبەرلىگىمەن كوزگە ءتۇستى.

اقتاۋلىقتار 70-مينۋتتا ءبىر دوپتىڭ ەسەسىن قايتارىپ ۇلگەردى. دوپتى تورعا گەورگي پانتسۋليا ءتۇسىردى. ءسويتىپ، ماتچ 3:1 ەسەبىمەن الاڭ يەلەرىنىڭ پايداسىنا شەشىلدى.

ءبىر وكىنىشتىسى، ماتچتا بيىلعى فۋتبول ماۋسىمىنىڭ العاشقى قىزىل قاعازى دا كورسەتىلدى. تارازدىق اربيتر ساكەن بايىمبەت الاڭ يەلەرى ساپىنداعى سەرگەي مالىيعا قىزىل قاعاز كورسەتتى.

بۇگىن سونداي-اق، تالدىقورعاندا جەرگىلىكتى «جەتىسۋ» مەن «اقتوبە» كۇش سىناستى. وندا كەزدەسۋدىڭ 83-مينۋتىندا قوناقتار جالعىز گول سالىپ، جەڭىستى تارتىپ اكەتتى. قوستانايدا «توبىل» مەن پاۆلودار وبلىسىنىڭ «اقسۋ» كلۋبىن 3:1 ەسەبىمەن، استانادا «استانا» قاراعاندىنىڭ «شاحتەر» كومانداسىن 2:1 ەسەبىمەن ۇتتى.

ەرتەڭ «ماقتاارال» مەن «وقجەتپەس»، «قايرات» پەن «اتىراۋ» كوماندالارى جاسىل الاڭعا شىعادى.

داستان كەنجالين،

استانا