Búgin fýtboldan Qazaqstan chempıonaty bastaldy (VIDEO)

Búgin fýtboldan Qazaqstan chempıonaty bastaldy. Premer-lıganyń (burynǵysha – Joǵary lıga, — red.) birinshi matchy Shymken qalasynda boldy. Onda Qajymuqan atyndaǵy stadıonda maýsymashar matchta jergilikti «Ordabasy» men Aqtaýdyń «Kaspıı» komandalary kezdesti.

Oıynda 3:1 esebimen alań ıeleri jeńiske jetti. Bıylǵy maýsymnyń alǵashqy golyn Shymkent qalasynyń komandasyna jańadan qosylǵan Baýyrjan Islamhan saldy. Ol eki jyl úzilisten keıin goldyń avtory atandy. Islamhan matchtyń 16-mınýtynda alystan qarsylastar qaqpasyna qaraı belgilengen aıyp dobynan saldy. Osylaısha dopıng daýyna baılanysty eki jyl úlken fýtboldan shettetilip, ortaǵa endi oralyp otyrǵan forvard óziniń jańa synaqtarǵa daıyn ekenin kórsetti.

Ekinshi taımnyń 49-mınýtynda jartylaı qorǵaýshy Ashat Taǵybergen mergendik tanytyp, esepti 2:0-ge jetkizdi. Ol da standartty jaǵdaıda qaqpany dál kózdedi. Al 65-mınýtta esep 3:0-ge jetti. Bul joly jaqynda quramǵa alynǵan ózbekstandyq fýtbolshy Bobır Abdıholıkov sheberligimen kózge tústi.

Aqtaýlyqtar 70-mınýtta bir doptyń esesin qaıtaryp úlgerdi. Dopty torǵa Georgıı Panýlııa túsirdi. Sóıtip, match 3:1 esebimen alań ıeleriniń paıdasyna sheshildi.

Bir ókinishtisi, matchta bıylǵy fýtbol maýsymynyń alǵashqy qyzyl qaǵazy da kórsetildi. Tarazdyq arbıtr Sáken Baıymbet alań ıeleri sapyndaǵy Sergeı Malyıǵa qyzyl qaǵaz kórsetti.

Búgin sondaı-aq, Taldyqorǵanda jergilikti «Jetisý» men «Aqtóbe» kúsh synasty. Onda kezdesýdiń 83-mınýtynda qonaqtar jalǵyz gol salyp, jeńisti tartyp áketti. Qostanaıda «Tobyl» men Pavlodar oblysynyń «Aqsý» klýbyn 3:1 esebimen, Astanada «Astana» Qaraǵandynyń «Shahter» komandasyn 2:1 esebimen utty.

Erteń «Maqtaaral» men «Oqjetpes», «Qaırat» pen «Atyraý» komandalary jasyl alańǵa shyǵady.

Dastan KENJALIN,

ASTANA