رىباكينا ەيس جاساۋ جونىنەن كوش باستادى

قازاقستاننىڭ ءبىرىنشى راكەتكاسى ەلەنا رىباكينا تاعى ءبىر تاريحي ناتيجەگە جەتتى. ول حالىقارالىق تۋرنيرلەردەگى سوڭعى ءتورت ويىندا 10 جانە ودان كوپ ەيس جاساپ، اتاقتى امەريكالىق تەننيسشى سەرەنا ءۋيليامستىڭ تاريحي ناتيجەسىن قايتالادى.

قازىر رىباكينا اقش-تىڭ مايامي شتاتىندا ءوتىپ جاتقان WTA 1000 تۋرنيرىنە قاتىسىپ جاتىر. وسى دودادا ول اننا كالينسكايامەن كەزدەسۋدە 14، پاۋلا بادوسامەن ويىندا 12، ەليزا مەرتەنسپەن وتكەن ماتچتا 10 ەيس جاسادى. ودان باسقا تەننيسشى شيرەك فينالدا مارتينا ترەۆيزانمەن ويىندا تاعى 10 ەيس جاساپ كوردى.

رىباكينا بيىلعى ماۋسىمدا 25 ماتچتا 201 ەيسكە جاساعان.

كوپ ەيس جاساعان تەننيسشىلەردىڭ اراسىندا فرانتسيالىق كارولين گارسيا مەن بەلارۋس وكىلى ارينا سوبولەنكو بار. ولار ەكىنشى جانە ءۇشىنشى ورىندا تۇر.

داستان كەنجالين،

استانا