SportPress.kz قازاقستان سپورت جاڭالىقتارى
الماتى قالاسىندا سپورتتىق گيمناستيكادان قازاقستاننىڭ VI جازعى سپارتاكياداسى باستالدى. بۇل تۋرالى مادەنيەت جانە سپورت مينيسترلىگىنىڭ سپورتتى دامىتۋ ديرەكتسياسى حابارلادى.
ءتورت جىلدا ءبىر كەلەتىن بۇل جارىسقا 7 وڭىردەن 40-تان اسا ەر ادام، 8 وڭىردەن 50-گە تارتا تاڭداۋلى ايەل گيمناست قاتىسادى. كوماندالار شەرۋىندە رەسپۋبليكالىق سپورتتى دامىتۋ ديرەكتسياسىنىڭ جانە وبلىستىق سپورت باسقارماسىنىڭ وكىلىدەرى ءسوز سويلەپ، اتلەتتەرگە ساتتىلىك تىلەدى.
بۇگىن ەرلەر مەن ايەلدەر ىرىكتەۋ كەزەڭىندە باق سىناسا، 20-21 ساۋىردە جەكەلەي جانە كوپسايىستان فينال وتەدى. بۇل سپارتاكياداعا ەلىمىزدىڭ جاستار مەن ەرەسەكتەر قۇراماسىنىڭ سپورتشىلارى قاتىسىپ، الداعى حالىقارالىق جارىستارعا دايىندىعىن پىسىقتايدى.
ەل ىشىندەگى وليمپياداعا بارلىق جاستاعى ۇلتتىق قۇراما سپورتشىسى جينالدى. ءبارى ءوز كومبيناتسيالارىنا جاڭا ەلەمەنتتەر قوسىپ، جەتىلدىرىپ كورەدى. مىسالى، شىمكەنتتىك دياس تويشىبەكتىڭ قارقىنى جاقسى. ول مۇندا ەكى باعدارلامادا كۇردەلى ەلەمەنتەر ىستەيدى. دياس سپارتاكيادادان سوڭ بىردەن الەم كۋبوگىندا ونەر كورسەتەدى. ءبارى ويداعىداي وتسە، بەلگياداعى الەم چەمپيوناتىنا اپارامىز، — دەدى ناريمان كۋربانوۆتىڭ جەكە باپكەرى، قازاقستاننىڭ ەڭبەك سىڭىرگەن جاتتىقتىرۋشىسى حۋسانجان كۋربانوۆ.
قازىر نەگىزگى ۇلتتىق قۇراما جاساقتالعان. جاتتىقتىرۋشىلار سپارتاكيادادان سوڭ ەكى قۇراما جاساقتايدى. ولار قىتايداعى ازيا ويىندارىندا ەل نامىسىن قورعاسا، ليدەرلەر كۇزدە بەلگيادا وتەتىن الەم چەمپيوناتىندا سىنعا تۇسەدى. انتۆەرپەندە جەكە باعدارلامانىڭ ءار جەڭىمپازى مەن ۇزدىك ناتيجە كورسەتكەن 12 قۇراما پاريج وليمپياداسىنا تىكەلەي جولداما الادى.
4 جىل بۇرىن الماتىدا وتكەن سپورتتىق گيمناستيكادان V سپارتاكيادادا ايەلدەر اراسىندا جالپى ەسەپتە الماتى قالاسى ءبىرىنشى ورىن السا، قاراعاندى مەن استانا كومانداسى ودان كەيىنگى ساتىعا جايعاسقان. ەرلەر اراسىندا دا الماتى قالاسى توپ جارسا، شىمكەنت قالاسى ەكىنشى، پاۆلودار وبلىسى ءۇشىنشى ورىنعا يە بولعان.
گيمناستار باسەكەسى قالاداعى №9 وليمپيادا رەزەرۆىنىڭ مامانداندىرىلعان بالالار-جاسوسپىرىمدەر مەكتەبىندە بولىپ جاتىر.
شامكەن بايىربەك،
فوتو: مادەنيەت جانە سپورت مينيسترلىگىنىڭ سپورتتى دامىتۋ ديرەكتسياسى
استانا
