بوكس: التىنشى كۇنگى جەتىستىك – ەكى جەڭىس

وزبەكستاننىڭ استاناسى – تاشكەنت قالاسىندا جالاۋ جەلبىرەتكەن بوكستان الەم چەمپيوناتىنىڭ التىنشى كۇنىندە رينگكە ەكى قازاق كوتەرىلىپ، ەكەۋى دە 5:0 ەسەبىمەن جەڭىسكە جەتتى. بۇل تۋرالى rast.kz حابارلادى.

بۇگىن 63،5 كەلىگە دەيىنگى سالماقتاعىلار – 1/8 فينالدىق، ال 67، 71 كەلىگە دەيىنگى سالماقتاعىلار 1/16 فينالدىق جەكپە-جەكتەر وتكىزدى.

ءبىزدىڭ ەكى اتلەت تە كۇندىزگى سەسسيادا شايقاستى. ەكەۋى دە تاشكەنت رينگىنە ءبىرىنشى رەت شىقتى. سونىڭ ىشىندە 67 كەلىگە دەيىنگى سالماقتاعى دۋلات بەكباۋوۆ رۋمىنيالىق اندرەي مۋستەتتەن، ال 71 كەلىگە دەيىنگى سالماقتاعى كوماندا كاپيتانى اسلانبەك شىمبەرگەنوۆ ترينيداد جانە توباگو وكىلى اارون پرينستەن ءۇش راۋندتا باسىم بولدى.

ەندى ەكى بوكسشىمىز دا 9 مامىر كۇنى شارشى الاڭعا شىعىپ، 1/8 فينالدىق جەكپە-جەكتەرگە قاتىسادى. سول جولى دۋلات – قىتايلىق فۋ مينگكەمەن، اسلانبەك يزرايلدىك ميروسلاۆ كاپۋلەرمەن شيرەك فينالعا شىعۋ ءۇشىن كۇش سىناسادى.

بۇگىن وزبەكستان قۇراماسى ساپىندا 63،5 كەلىگە دەيىنگى سالماقتا ونەر كورسەتىپ جاتقان قازاق جىگىتى رۋسلان ابدۋللاەۆ كەزەكتى جەڭىسىنە جەتتى. ول وتكەن جولى ءبىزدىڭ ءساناتالى تولتاەۆتىڭ جولىن كەسكەن ماۆريكيلىك ريچارنو لۋيس كوليندى ايقىن باسىمدىقپەن جەڭىپ شىقتى. وسى جەردە رۋسلاننىڭ بۇدان ەكى جىل بۇرىن قازاقستانعا كەلىپ، ءوزىن قاتارعا قوسۋدى وتىنگەندە، قۇرامانىڭ سول كەزدەگى شتابى كومانداعا قابىلداۋدان باس تارتقانى ەرىكسىز ەسكە تۇسەدى. ودان بەرگى ارالىقتا ءبىزدىڭ وزبەكستاندىق قانداسىمىز ازيا چەمپيونى اتانىپ ۇلگەردى.

بۇعان دەيىن قازاقستان قۇراماسى ساپىنان تالعات سىرىمبەتوۆ (60 كگ)، ءساناتالى تولتاەۆ (63، كگ) جانە ايبەك ورالباي (92 كگ) سىندى جىگىتتەردىڭ جارىس جولىنان شىعىپ قالعاندارىن ايتا كەتكىمىز كەلەدى. وزبەكستان قۇراماسى قۇرامىنان كەشە ءبىرىنشى بوكسشى – جاسۋربەك يۋلداشوۆ (80 كگ) ساتسىزدىككە ۇشىرادى.

ەرتەڭ، 7 مامىر، چەمپيوناتتىڭ جەتىنشى كۇنى 51، 57، 75 كەلىگە دەيىنگى جانە 92 كەلىدەن اۋىر سالماقتارداعى اتلەتتەر رينگكە كوتەرىلەدى. بۇل ساپتا بىزدەن ساكەن بيبوسىنوۆ (51 كگ)، سەرىك تەمىرجانوۆ (57 كگ)، نۇرقانات رايىس (75 كگ) جانە قامشىبەك قوڭقاباەۆ (+92 كگ) بار. بۇلاردىڭ اراسىندا ساكەن مەن نۇرقانات الەم چەمپيوناتىنداعى ءبىرىنشى شايقاستارىن 1/16 فينالدان باستايدى. ال قالعان ەكەۋى 1/8 فينالدىق ايقاسقا شىعادى.

اتاپ ايتقاندا، بۇل كۇنى ساكەن – ۇندىستاندىق ديپاك ديپاكپەن، سەرىك – ۆەنگەر رولاند ۆەرەسپەن، نۇرقانات – دومينيكاندىق ۆيرگيليا دە لوس-سانتوس دەلگادومەن، ال قامشىبەك سيريالىق موحامماد ملايەسپەن كەزدەسەدى. بۇلاردىڭ الدىڭعى ۇشەۋى رينگكە كۇندىزگى سەسسيادا، ال قامشىبەك كەشكى سەسسيادا شىعادى. جارىس كۇنىنىڭ ا رينگىندەگى شىمىلدىعىن ساكەن ءوزىنىڭ قارسىلاسىمەن بىرگە اشىپ بەرەدى.

ەگەر ساكەن جەڭىسكە جەتەر بولسا، زانگ جياماو (قىتاي) – مەحروب حاميدوۆ (تاجىكستان)، سەرىك جەڭىس تۇعىرىنان تابىلسا، دەل-رەي سايدەل ورتا رودريگەس (كۋبا) – حوسە لۋيس دە لوس-سانتوس فەليز (دومينيكا)، نۇرقانات قارسىلاسىنان اسىپ ءتۇسىپ جاتسا، فاحاد الحۋري ء(باا) – ۋاندەرەي پەرەيرا (برازيليا)، قامشىبەك ۇتىپ شىقسا، باحودير جالولوۆ (وزبەكستان) – تەرەموانا تەرەموانا (اۆستراليا) جۇپتارىنىڭ جەڭىمپازدارىمەن كەلەسى اينالىمدا بەتپە-بەت كەلەدى.

كۇندىزگى سەسسيا شايقاستارى – ساعات 14:00-17:00، كەشكى سەسسيا ساعات 18:00-21:00 ارالىعىندا وتەدى.