Alpystyń asqaryndaǵy Jeltoqsan batyrlarynyń alamany

Jaqynda Patrıottyq qozǵalys «Jeltoqsan Aqıqaty» respýblıkalyq qoǵamdyq birlestiginiń uıymdastyrýmen ǵasyrlar boıy Alash jurty arman etken el táýelsizdigine qol jetkizgen, tarıh betinde óshpes iz qaldyrǵan Jeltoqsan ardagerleri arasynda «BÁRIN DE KО́RDIŃIZDER, SIZDER ALPYSQA KELDIŃIZDER» aıdarymen voleıboldan Almaty  qalalyq týrnıri ótkizildi.

Jarys alańynda tek qana Jeltoqsan ardagerleri  shyǵyp, jeńis úshin bar sheberlikterin kórsetti.

Jeltoqsan ardagerleri arasyndaǵy alaman jarys Almatynyń Uljan shaǵyn aýdanynda ornalasqan № 152 mekteptiń shańyraǵynda bolyp ótti.

PQ «Jeltoqsan Aqıqaty» respýblıkalyq qoǵamdyq birlestiginiń muryndyq bolýymen ótken qalalyq týrnır tek Jeltoqsan ardagerlerine ǵana arnalǵan edi. Qatysýshalar — el táýelsizdigin jeńip ápergen Jeltoqsan ardagerleri. Aıtýly qoǵamdyq birlestiktiń qaladaǵy barlyq aýdanyndarda ornalasqan fılıaldarynan tórt komanda kelip syn alańyna shyqty.

Jarystyń saltanatty ashylýynda sóz alǵan PQ «Jeltoqsan Aqıqaty» respýblıkalyq qoǵamdyq tóraǵasy Bolat Qurymbaev myrza bul jarystyń aldaǵy jyly dástúrlik sıpat alatynyn jarııa etip, ardagerlerge tartysty oıyn tiledi. Sonymen qatar, Almaty qalalyq Alataý aýdany ákimdiginen kelgen ókil 60 jasqa tolǵan Jeltoqsan batyrlaryn qurmetpen quttyqtap, maqtaý qaǵazdaryn tabys etti.

Qalalyq týrnırdi ótkizý barysynda belsendilik tanytqan Almaty qalalyq fılıalynyń Alataý aýdandyq bólimshesiniń jáne Almaty oblystyq fılıalynyń múshelerine kelgen qonaqtarǵa dastarhan jaıylyp as berildi.

Qalalyq ákimshilik tarapynan batyrlardy umytpaı iltıpat kórsetkenderi maqtaýǵa turarlyq. Negizi táýelsizdigimiz úshin 1986 jyldyń saryshunaq sara aıazynda alańǵa shyqqan batyrlar jyldar boıy óz statýsyn ala almaı, qanshama esikti qaǵyp shapqylap júrgenin joǵarydaǵylar bilse de bilgisi kelmeı kelgen edi. Allaǵa táýbe, osy jyly Jeltoqsan ardagerlerine qurmet pen qoshemet aqparat quraldarynda da ashyq jarııa etilip, bılik betin bura bastaǵan sekildi. Seń qozǵalǵandaı. Batyrlar bıliktiń Jeltoqsandyqtarǵa jyly shyraı tanyta bastaǵynyn kórip jaqsylyqqa jorydy. Al, ózderin qoǵamnan umyt qaldyrmaý úshin Jeltoqsan ardagerleri el arasynda jıi sharalar ótkizip, osyndaı sporttyq básekelerdi tynbaı uıymdastyryp keledi.

Aıtalyq, osy dúbirli jarysqa at qoıyp, aıdar taqqan belgili jýrnalıst, uıymynyń tarapynan ótkiziletin barlyq sharalardyń uıymdastyrýshylarynyń biri, qoǵam belsendisi uıymnyń basqarma múshesi, Jeltoqsan ardageri Aqyn Ordabaıuly men aıtýly uıymnyń basqarma múshesi, sport sektory, óz isiniń bilikti mamany Ermek Aıtýarovtyń eńbegin erekshe atap ótkenimiz abzal.

Ermek Nurǵalyquly atalǵan sharany joǵary deıgeıde uıymdastyra bildi. Al Aqyn Ordabaıuly osy is-sharanyń buqaralyq aqparat quraldarynda jarııalanýynan bastap basqa jumystaryna uıytqy boldy. Sondyqtan da qos azamattyń bilek túre birige jasaǵan jarysyna kópshilik zor alǵystaryn bildirdi.

Negizi bul týrnır jastary 60-qa kelgen Jeltoqsan batyrlary men Jeltoqsan qandy kóterilisiniń 36 jyl tolýyna oraı arnalǵandyǵyn basa aıtqymyz keledi.

Hosh, kún uzaq syn alańda shúmektep ter tógip, jeńis úshin jan aıamaǵan ardagerler kún eńkeıe baryp jeńimpazdardy anyqtap qurmetpen marapattady. Týrnırdiń jeńimpazy bolyp «Alataý» komandasy atansa, Jetisý aýdany kúmis júldemen kúpteldi. Jarystyń júldeli úshinshi orynyn Naýryzbaı aýdanynyń komandasy ıelendi. Al, týrnır kestesindegi tórinshi oryndy Áýezov aýdany túıindedi.

Bul týrnırdi nasıhattaýǵa kelgen «31» telearna men «Almaty» telearnalaryna aqsamaıly Jeltoqsan ardagerleri aq batasyn berip, úlken alǵystaryn jetkizdi. Týrnırdiń joǵary deńgeıde ótýine uıym tóraǵasy Bolat Toqtabaıulynyń qosqan úlesi zor. О́ıtkeni, jarystyń basynan aıaǵyna deıin shapqylap júrip, óz batyrlaryna qoldaý, qoshemet jasaıtyn osyndaı jandardy kórip razy bolasyń. Al, Jeltoqsan batyrlary jarysta jeńis úshin bilgenin sarqyp baryn saldy. «Syrly aıaqtyń syry ketse de syny ketpeıdi», degendeı oıyn alańynda kádýilge ushpa doptyń jiligin shaǵyp maıyn ishken has sheberlerdeı tartysty oıyn kórsetken Jeltoqsan batyrlary kópke úlgi-ónege desek bolady. Iá, bir on jyldy ysyryp alǵa aparsa jyldamdyq qandaı bolar edi. Al, sheberlik jaǵyna esh syn aıta almaısyń. Kóre tura tánti bolmasqa shara joq. «Jaraısyńdar batyrlar!»,  dep qamshylaı aıtqan qýatty qoldaý sózder sport zaldyń ishinde soqqan jeldeı gýlep turdy. «Sport densaýlyq kepili», — demekshi, birinshiden, densaýlyǵyn jaqsartyp, ekinshiden, sport arqyly bir -birimen syrlasyp, qaýyshyp sher tarqasyp qalatyn Jeltoqsan ardagerleri úshin osyndaı jarystardyń baǵasy sheksiz. Aman bolyńyzdar batyrlar!!!

 

Jandos AHMETOV,

Patrıottyq qozǵalys «Jeltoqsan Aqıqaty» Respýblıkalyq qoǵamdyq birlestiginiń menedjeri