EURO-2024: Қазақстан құрамасы Сан-Марино командасын жеңді (ФОТО, ВИДЕО)

Астанада футболдан Еуропа чемпионатының іріктеу турнирінде Қазақстан ұлттық құрамасы Сан-Марино командасымен ойнап, 3:1 есебімен жеңіске жетті.

Бұған дейін ұлттық құрама қарсыластарымен үш рет кездесіп, үшеуінде де жеңіске жеткен еді. Бұл матчтар 4:0, 3:1, 3:0 есептермен аяқталды. Ал бүгінгі матч «Астана Арена» стадионында болды. Оған 30 100 адам жиналды. Стадионда ине шаншар орын болмады. Мачты тамашалауға президент Қасым-Жомарт Тоқаев та барды.

Матчта бірінші болып Қазақстан құрамасы алға шықты. Ойынның 19-минутында Қостанайдың «Тобыл» клубының жартылай қорғаушысы Ислам Чесноков алыстан сол аяғымен гол салып, есеп ашты. Ол үзілістен кейін де екінші голдың авторы атанды. Бұл жолы да жартылай қорғаушы алыстан сол аяғымен қақпаны дәл көздеді. Осыдан кейін ұлттық құраманың бас жаттықтырушысы Магомед Адиев ойыншыларды алмастырып, «ойын картасын» араластырып жіберді. Сан-Марино құрамасы да төрт ойыншыны алмастырды. Қазақстан командасында бес ойыншы алаңға шықты.

Үзілістен кейін 60-минутында Сан-Марино есеп айырмасын қысқартты. Ал ойынның 90+2 минутында Абат Айымбетов пенальтиді сәтті орындап, таблодағы есепті өзгертті. Есеп — 3:1.

Құрамалар алаңға мына құрамда шықты:

Қазақстан: Шацкий, Қайыров (Скворцов 54), Малый, Марочкин, Быстров (Ерланов 54), Досмағамбетов (Вороговский 61), Чесноков, Бейсебеков, Зуев (Тапалов 74), Оразов (Кеңесов 54), Айымбетов;

Сан-Марино: Бенедеттини, Батистини, Фаббри, Ди Майо (Франкиози 46), Росси, Тоси, Голинуччи (Капиккиони 90+4), Капиккиони, Муларони (Лунадеи 90+4), Лаццари (Панкотти 77), Нанни (Витайоли 27);

Төрешілер: Лехнер, Хайденрейх, Пихлер (барлығы – Аустрия).

Қазақстан – Сан-Марино – 3:1 (1:0)

Голдар: Чесноков 19, Чесноков 51, Айымбетов (пенальти) 90+2 – Франчиози 60;

Ескертулер: Кеңесов 63, Ерланов 88 – Муларони 50, Фаббри 79, Панкотти 90+1;

17.11.2023. Қазақстан, Астана, «Астана-Арена».

Жалпы айтқанда, матч қызықты, тартысты болған жоқ. Бас жаттықтырушы Магомед Адиев ойыншыларды ерте алмастырды. Ол жаңа ойыншыларды алаңға ерте шығарып, алаңның жиегінде жүрегін ұстап, мазасызданып жүріп қалды. Оразов пен Быстровты матчтың соңына дейін, ең болмағанда 80-минутқа дейін ойнату керек еді.

Асхат Тағыберген мен Бақтиер Зайнутдиновтың орны білініп қалды. Егер Ислам Чесноков екі гол салып, дубль жасамаса, VAR пенальти бермесе ойынның қандай есеппен аяқталатынын ойлаудың өзі қиын. Нұрәлі Әліп пен Самородов сары қағаздың кесірінен алаңға шықпады. Енді олар 21 қарашада сырт алаңда болатын матчта басқа ойыншылармен бірге барын салатынына сенеміз. Данияны өз алаңымызда, Финляндияны сырт алаңда жеңгендей қолда бар мүмкіндіктің бәрін салып ойнасақ жеңіспен қайтуға болады.

Қазір алаңдағы әр минут, әр тепкен доп, пас маңызды. Ең бастысы жігіттерге қателеспей ойнап, гол жіберіп алмауға тырысып ойнау керек. Бізде баспен ойнай алатын, алыстан доп тебетін, айып добын соға алатын ойыншылар бар. Сондықтан үмітсіз шайтан дейді.

Сөз соңында айтарымыз, кешегі күн де міне, тарих қойнауына кетті.

Кеше футболдан ұлттық құрама Аппенин түбегінен келген Сан-Марино елінің командасын 3:1 есебімен жеңіп, Еуропа чемпионатына жолдама алуға тағы бір мүмкіндік алды. Бір табан жақындады.

Енді 21 қарашада Словения жасағымен ойнап, бір Құдайдың көзі түзу болып, қарсыласты сырт алаңда жеңіп жатсақ, бұл шыныменде тарихи оқиға болады. Сол кезде бұл күн қазақ футболының тарихында алтын әріппен қашалып жазылған күнге айналады. Лайым Алла тағала сол күнге жеткізсін!

9 турдан кейін H тобында Қазақстан құрамасының қоржынында 18 ұпай. Ұлттық құрама Еуро-2024 іріктеу кезеңіндегі соңғы ойынын 20-қарашадан 21-не қараған түні Словения командасына қарсы өткізеді. Ал Дания құрамасы Словенияны 2:1 есебімен жеңіп, Еуропа чемпионатына жолдама алды.

 

Дастан КЕНЖАЛИН,

ФОТО: Ілияс ОМАРОВ

АСТАНА