Үкімет басшысы жасөспірімдер Олимпиадасының чемпионы мен жүлдегерлерін марапаттады

Премьер-министр Олжас Бектенов 19 қаңтар мен 1 ақпан аралығында Канвондода (Корея Республикасы) өткен IV қысқы жасөспірімдер Олимпиадасының чемпионы мен жүлдегерлеріне мемлекет басшысының атынан алғыс хаттарды табыс етті, деп хабарлады Үкіметтің баспасөз қызметі.

Үкімет басшысы президент Қасым-Жомарт Тоқаевтың алғыс хатын оқып беріп, спортшыларды құттықтады. Премьер-министр бұл Қазақстанның жасөспірімдер арасындағы қысқы Олимпиада ойындары тарихындағы алғашқы алтын жүлдесі екенін атап өтті. Жалпы медаль саны бойынша Қазақстан әлемнің 78 елі арасында 20-орынды иеленді.

Спорт – елдің мәртебесін биіктетіп, мемлекеттің қуаты мен өсіп келе жатқан әлеуетіне деген адамдардың сенімін нығайта түсетін маңызды фактор. Қазақстандықтар сіздердің жеңістеріңізді мақтан тұтады. Өздеріңіз сияқты ерік-жігері мықты жас спортшылардың еліміздің болашағы екеніне кәміл сенемін. Жеңіс жолында қолдау көрсеткен тәлімгерлер мен жаттықтырушылар ерекше алғысқа лайық. Бүгінгі бағындырған биік белестер алдағы Олимпиадалардағы жетістіктердің бастауы деуге болады, — деді Олжас Бектенов.

Шаңғымен тұғырдан секіру бойынша IV қысқы жасөспірімдер Олимпиадасының чемпионы Илья Мизерных пен оның жаттықтырушысы Қайрат Биекеновке алғыс хаттар табыс етілді.

Сонымен қатар шайбалы хоккей бойынша қола жүлде олжалаған Арсений Кучковский, Никита Кулаков, Темірлан Айболұлы, Матвей Решетько, Расул Тұрсынов, Жаһангер Тілеухан, Таир Бигаринов, Егор Кравченко, Роман Мичуров, Әділхан Саттар, Әнуар Ахметжанов және команданы жаттықтырушы Рамазан Қайдаровтың да еңбектері атап өтілді.

Ойындар чемпионы Илья Мизерных барлық спортшының атынан алғыс білдіріп, дайындық кезінде құраманың жаттықтырушылар қойған міндеттерін барлық күш-жігерін салып орындағанын айтты.

Алтын медаль – менің ғана жеңісім емес, бұл бүкіл команда мен жаттықтырушылар құрамының жұмысының нәтижесі. Еліміздің президенті Қасым-Жомарт Кемелұлы Тоқаевтың құттықтауын естіп, төбем көкке жеткендей болды. Ол маған және басқа қазақстандық спортшыларға да жаңа жеңістер тіледі. Бұл бізді одан әрі шабыттандыра түседі. Шалғайда жүрсек те біз үлкен қолдауды сезіндік, бұл – біздің ортақ жеңісіміз! Алға, Қазақстан! – деді ол.

Жалпы медаль саны бойынша Қазақстан әлемнің 78 елі арасында 20-орынды иеленді.