سپورتشىلار 2028 جىلعى وليمپياداعا دايىندالۋ ماقساتىندا حوك ستيپەندياسىنا يە بولدى

ەلىمىزدىڭ حالىقارالىق وليمپيادا كوميتەتىنىڭ (حوك) 2028 جىلى لوس-اندجەلەستە (اقش) وتەتىن وليمپيادا ويىندارىنا دايىندالۋ ماقساتىندا جەكەلەي ستيپەندياسىن العان سپورتشىلاردىڭ ەسىمى بەلگىلى بولدى، دەپ حابارلادى ۇلتتىق وليمپيالىق كوميتەت.

بۇل باستامانى قازاقستان ۇلتتىق وليمپيالىق كوميتەتى كوتەرىپ، ۇلتتىق فەدەراتسيالارمەن جانە حوك-مەن بىرلەسە جۇمىس جۇرگىزدى. سونداي-اق بارلىق قاجەتتى قۇجاتتاردى راسىمدەۋدى قامتاماسىز ەتتى.

باعدارلامانىڭ ماقساتى — سپورتشىلاردى تورتجىلدىقتىڭ باستى دوداسىنا ىرىكتەۋ كەزەڭىندە جانە دايىندىق بارىسىندا قولداۋ. ۇسىنىلعان كانديداتتار ۇلتتىق فەدەراتسيالار ارقىلى ىرىكتەلىپ، گەندەرلىك تەڭدىك ساقتالدى. ءار سپورت تۇرىنەن ءبىر ەر جانە ءبىر ايەل سپورتشى ۇسىنىلدى. سونىمەن قاتار مۇمكىندىگىنشە كوبىرەك سپورت ءتۇرىن قامتۋعا ءمان بەرىلدى، وسىلايشا ءارتۇرلى باعىتتاعى اتلەتتەرگە قولداۋ كورسەتىلدى.

ستيپەنديا لوس-اندجەلەس وليمپياداسىنىڭ باعدارلاماسىنا ەنگەن جەكەلەي سپورت تۇرلەرىندە ونەر كورسەتەتىن سپورتشىلارعا بەرىلەدى. مىندەتتى تالاپتار: ىرىكتەۋدەن وتۋگە جانە  جوعارى ورىندارعا ۇمىتكەر بولۋعا مۇمكىندىك بەرەتىن ناتيجەلەر، سونداي-اق دوپينگكە قارسى ەرەجەلەردى بۇزباۋ جانە وليمپيادالىق حارتياعا قايشى كەلەتىن سانكتسيالاردىڭ بولماۋى.

قارجى وقۋ-جاتتىعۋ جيىندارىنا، جەكەلەي دايىندىقتارعا، باپكەرلەر مەن مامانداردىڭ ەڭبەكاقىسىن تولەۋگە، مەديتسينالىق جانە عىلىمي قولداۋعا، ساقتاندىرۋعا، سونداي-اق تۇرۋ مەن تاماقتانۋعا جۇمسالادى. قاراجاتتىڭ ماقساتتى جۇمسالۋى تۇراقتى ەسەپپەن قاداعالانادى.

قازاقستاننان باعدارلاماعا ەنگەن سپورتشىلار ءتىزىمى:

— ايدا ابىكەەۆا (بوكس)

— ساعىندىق توعامباي (بوكس)

— عۇسمان قىرعىزباەۆ (دزيۋدو)

— ءابيبا ابۋجاقىنوۆا (دزيۋدو)

— ميلاد كاريمي (سپورتتىق گيمناستيكا)

— رۋسلان كۋربانوۆ (سەمسەرلەسۋ)

— يسحار كۋرباەۆ (گرەك-ريم كۇرەسى)

— ريزابەك ايتمۇحان (ەركىن كۇرەس)

— زەينەپ بايانوۆا (ايەلدەر كۇرەسى)

— ماريا بروۆكوۆا (بايداركا مەن كانوەدە ەسۋ)

— الەكساندرا لە (نىسانا كوزدەۋ، پنەۆماتيكالىق قارۋ)

— يسلام ساتپاەۆ (نىسانا كوزدەۋ، پنەۆماتيكالىق قارۋ)

— ءامىر مايمۇراتوۆ (سپورتتىق قۇزعا ورمەلەۋ)

— باتىرحان تولەۋعالي (تاەكۆوندو)

— الان قۇرمانعاليەۆ (ۇستەل تەننيسى)

— ەليزاۆەتا ماتۆەەۆا (جەڭىل اتلەتيكا)

— اسەم ورىنباي (ستەند اتۋ)

— سەرگەي پەتروۆيچ (اۋىر اتلەتيكا)

— اراي نۇرلىبەكوۆا (اۋىر اتلەتيكا)

— دانيل مۋساباەۆ (باتۋتتاعى گيمناستيكا).

قازاقستان سپورتشىلارىنىڭ بۇل باعدارلاماعا ەنۋى ولاردىڭ وليمپيادا-2028 ويىندارىنا جۇيەلى ءارى ساپالى دايىندىق جۇرگىزۋىنە قوسىمشا مۇمكىندىك بەرەدى.