Shyńjań – Qazaqstan men Qytaıdyń arasyn jalǵaıtyn altyn kópir

Almatydaǵy QHR bas konsýly zıan Veı birqatar jýrnalıstermen resmı túrde brıfıng ótkizip, Shyńjań ólkesiniń damýyna erekshe toqtaldy.

Brıfıngte QHR bas konsýly zıan Veı qalamgerlerdiń tolǵandyrǵan suraqtaryna jaýap berdi. Jýyrda biraz jýrnalıst Shyńjań -Uıǵyr avtonomııalyq aýdanyna press-týr saparymen barǵan bolatyn. Sebebi, bıyl Shyńjań-Uıǵyr avtonomııalyq aýdanynyń qurylǵanyna 70 jyl tolǵan edi. Sol is-shara aıasynda QHR tóraǵasy Sı zınpın bul mereıtoıǵa arnalǵan saltanatty jınalysqa qatysyp, Úrimjidegi barlyq etnostardyń ókilderimen birge merekeni toılaǵan-dy.

Almatyda iri logıstıkalyq kólik ashý josparlanýda. Bunyń ózi shekaralyq saýda salasyn kúsheıtpek. Alaıda tek ekonomıkalyq, tehnıkalyq qana emes, Shyńjań aýylsharýashylyq turǵysynan da elimizge tıimdi usynys jasamaq. zıan Veı hanym Almatyda shetelden keletin ádemi gúlderdiń kóptigin, alaıda baǵasy tym qymbat ekendigine qynjyldy. Al máselen Shyńjańda nebir túrli ásem gúlderdiń kóptep ósirilip jatqandyǵyn, egerde ol gúlder Qazaqstan naryǵyna ense áldeqaıda arzan baǵada satylatyndyǵyn atap ótti.

Týrızm máselesine de erekshe nazar aýdaryldy. Máselen, 2022 jyldan bastap bıylǵy jylǵa deıin, ıaǵnı sońǵy 3 jylda Úrimshige ishki jáne syrtqy týrızmdi sanaǵanda 700 mıllıonǵa jýyq adam kelgendigin tilge tıek etti. Osynyń ózi Shyńjań ólkesiniń týrısterdi asa qatty qyzyqtyratyndaı tabıǵaty men salynyp jatqan nebir túrli jobalar, ınfraqurylym, demalys oryndary jáne basqa da salalardyń kóbeıip jatqandyǵyn rastaıdy.

Brıfıngtiń basty tuzdyǵy Almatydaǵy QHR bas konsýly zıan Veı dıplomatııalyq mıssııanyń aıaqtalýyna baılanysty edi. Sondyqtan basqosýda ekonomıka, saıasat, týrızm, mádenıetpen qatar jyly lebizder men atqarylǵan ıgi ister de aıtyldy. Jýrnalıster qaýymy zıan Veı hanymǵa rızashylyǵyn bildirip, kádeli syılyqtar tabys etip, estelikke sýretke tústi.

Shyńjań – ejelgi Jibek jolynyń ortalyq aımaǵy. Ol ejelden Shyǵys pen Batysty baılanystyratyn mańyzdy túıin boldy. Shyńjań men Qazaqstan arasyndaǵy túrli saladaǵy almasýlardyń uzaq jylǵy tarıhy bar. ShUAR jańa dáýirinde ekonomıkalyq jáne áleýmettik damýda úlken jetistikterge jetti.

Shyńjań men Qazaqstannyń is júzindegi yntymaqtastyǵy órkendep, «Bir beldeý, bir jol» qurylysynyń joǵary sapaly birlesken jumystary ilgerileýge erekshe serpin berýde. Bul jer Qytaı men Qazaqstan arasyndaǵy máńgilik jan-jaqty strategııalyq seriktestik pen eki eldiń ártúrli salalardaǵy yntymaqtastyǵyn damytýǵa «Shyńjań úlesin» qosýda.

ShUAR Qytaıdyń soltústik-batysynda, Eýrazııanyń bel ortasynda ornalasqan. Shyńjańnyń aýdany – 1 mıllıon 664 myń 900 sharshy shaqyrym. Bul – Qytaıdyń eń úlken provınııalyq ákimshilik aýdany bolyp tabylady. Qytaı jeriniń shamamen altydan bir bóligin alyp jatyr. Ol segiz memleketpen shektesedi. Sonyń ishinde Reseı, Mońǵolııa jáne Qazaqstan memleketteri bar. Osynaý ásem de qunarly ólkede 56 halyq birlik pen yntymaqta ómir súrýde.

Nurlan QUMAR,

ALMATY