Ашғабадта V Азия ойындары өз мәресіне жетті

Түрікменстан астанасы Ашғабад қаласында жауынгерлік өнер түрлері бойынша жабық ғимаратта өткен V Азия ойындары бүгін өз мәресіне жетті.

Екі аптаға созылған додада қазақстандық спортшылар 28 алтын, 28 күміс, 40 қола, барлығы 96 медаль еншілеп, жалпыкомандалық есепте төртінші орынға тұрақтады.

Бас жүлдені жергілікті түрікмен спортшылары қанжығасына байлады. Олар жалпы саны 245 медаль жеңіп алды, оның 89-ы — алтын, 70 — күміс және 86 — қола.

Екінші орынға Қытай спортшылары орналасты. Олардың еншісінде 42 алтын, 32 күміс, 23 қола, жалпы 97 медаль бар.

Үшінші орынға 36 алтын, 23 күміс, 59 қола, барлығы 118 медальмен Иран құрамасы жайғасты. Қазір Ашғабадта V Азия ойындарының ресми жабылу салтанаты өтіп жатыр.

Барлығы 62 мемлекет қатысқан байрақты додада ел намысын Қазақстанның 150  спортшысы қорғады. Олар жарыстың 17 түрінен сынға түсті.

Азия ойындары деп аталған спорттық сайыс екі жылда бір рет Азия Олимпиадалық кеңесінің бақылауымен өтеді. Ең алғашқы ойындар 2005 жылы Бангкокта өтсе, одан кейін 2007 жылы Қытайдың Макао, 2009 жылы Вьетнамның Ханой, 2013 жылы Оңтүстік Кореяның Инчхон қалаларында ұйымдастырылды. Жарыстар өткізілген соңғы жылы Азия ойындары жауынгерлік өнер түрлері бойынша Азия ойындарымен біріктіріліп, оны 4 жылда бір рет өткізу туралы шешім қабылданды.

Биыл Ашхабадта жалауы желбіреген Азия ойындары «Денсаулық. Қайрат. Достық» ұранымен өтті. Азиаданың ресми нышаны ретінде Вепала есімді алабай иті таңдап алынды. Ол түрікмен тілінен аударғанда — «адал», «сенімді» деген мағынаны білдіреді.

Жарыстар шахмат, теннис, тай боксы, қазақ күресі, самбо, жеңіл атлетика, ауыр атлетика, баскетбол, ат спорты, бильярд, боулинг, спорттық билер, футзал сынды спорттың 21 түрінен өтті.