يۋليا مياسنيكوۆا: «كۇيەۋىمنىڭ قازاق بولعانىن قالايمىن»

فۋتبولدان قازاقستان ۇلتتىق قۇراما كومانداسى مەن ماسكەۋدىڭ تسسكا كلۋبىنىڭ شابۋىلشىسى يۋليا مياسنيكوۆا وسىلاي دەپ ايتتى

— يۋليا، رەسەيدە دوپ تەۋىپ جۇرگەن ساناۋلى قازاقستاندىقتىڭ ءبىرىسىڭ. مۇنداعى فۋتبول دەڭگەيى قانداي؟

— ارينە، رەسەيدە قىزداردىڭ فۋتبول ليگاسىنىڭ دەڭگەيى باسقاشا. ءبىز بىلتىر چەمپيون بولدىق. الايدا، مۇندا باسەكە وتە كۇشتى. مىسالى، قازاقستاندا 1-2 كلۋب قانا دەڭگەيلەس. قالعانىنىڭ دارەجەسى دە، دەڭگەيى دە تومەن.

— تسسكا كومانداسىندا ويناعاندىقتان ەرلەر كلۋبىنىڭ ويىنىن تاماشالاپ تۇراتىن شىعارسىڭ.

— البەتتە، ءبىز بارلىعىمىز ءبىر كلۋبپىز. جالاۋىمىز دا، كيىپ جۇرگەن جەيدەمىز دە ءبىر. جاتتىعاتىن جەرىمىز دە ءتۇبى ءبىر بولاتىن سياقتى. ەرلەر كومانداسىندا ءبىزدىڭ جەرلەسىمىز باقتيەر زاينۋتدينوۆ وينايدى.

— سىز ونىڭ ويىندارىن كورىپ جۇرسەڭىز، ءبىر-بىرىڭىزبەن جاقسى ارالاساتىن شىعارسىز؟

— ارينە. جاتتىعۋ كەزىندە، الاڭ سىرتىندا دا كورىپ تۇرامىن. سونشالىقتى ءجيى كەزدەسپەسەك تە، بايلانىس ۇزبەيمىز. قانشا دەگەنمەن قازاقستاننان بولعاندىقتان، ءبىر-ءبىرىمىزدى جىلى تارتامىز.

— باس جاتتىقتىرۋشى گريگوريان مىرزامەن سويلەستىم. ول كىسى سەنى ەرەكشە ماقتادى. قاراعاندىلىق بولعاندىقتان، كەنشىلەرگە ءتان مىنەز بار دەيدى.

— جاتتىقتىرۋشىعا ءبارى سىرتتان كورىنىپ تۇرادى عوي. مەن قازىر قاپتالدا وينايمىن. كوبىنەسە قورعانىسقا جاۋاپ بەرەمىن. اراكىدىك وزگە دە پوزيتسيالاردى جۇرەمىن. باقتيەر زاينۋتدينوۆ — امبەباپ فۋتبولشى. كەز كەلگەن جەردە وينايدى. مەندە سول سەكىلدى ناعىز كاسىپقوي فۋتبولشى بولۋعا تىرىسىپ ءجۇرمىن.

— ەلۆيرا تودۋا رەسەي قۇراماسىنىڭ نەگىزگى قاقپاشىسى: «يۋليا وتە شەبەر ويىنشى» دەپ ماقتاۋ ءسوز ايتتى. ونىڭ تسسكا ويىنىنا قانداي اسەرى بار؟

— ەلۆيرا زۋرابقىزى وتە تاجىريبيەلى ادام. ونىڭ ورنى ەرەكشە. كوماندانى ۇستاپ تۇراتىن 2-3 ادام بولسا، سونىڭ ءبىرى دەر ەدىم. ول مەن جايلى جاقسى پىكىردە ەكەنىن بايقادىم. بۇكىل قاپتال بويىنشا جۇگىرىپ، تالماي ەڭبەك ەتىپ، قورعانىستا قاتە جىبەرمەسەم ماقتاماسىنا امال جوق.

— قىزداردىڭ فۋتبولشى بولعانى ءالى دە ءبىرتۇرلى بولىپ سانالاتىنداي كورىنەدى. ولاردىڭ تۇرمىس قۇرىپ، انا بولۋعا تالپىنىسى جوق پا؟

— ءبىزدىڭ كوماندادا 3-4 فۋتبولشىنىڭ بالا-شاعاسى، كۇيەۋى بار. ولاردىڭ ءبىرازى فۋتبولشىلارعا تۇرمىسقا شىققان. بالا تۋىپ بولعان سوڭ 2 جىلدان كەيىن قايتادان فۋتبولعا كەلگەندەرى دە جوق ەمەس. ال مەن جەكە ومىرىمە كەلەتىن بولسام، ازىرگە ۇناتىپ جۇرگەن جىگىتىم جوق. كۇندە تاڭەرتەڭ جاتتىعۋعا كەتەمىن. سوسىن، ۇيگە بارىپ تۇسكى اس ىشەمىن. ءبىر ساعات ۇيىقتاپ الامىن دا، كەشكى جاتتىعۋعا قايتا بارامىن. ودان كەيىن ۇيگە بارىپ جۋىنىپ، تاماق ءپىسىرىپ جۇرگەندە كەش باتادى. ال ەرتەسىنە تاڭعى 8-دە قايتادان جاتتىعۋعا بارۋىم كەرەك. وسىلاي كۇندە قايتالانادى. وسىنىڭ ورتاسىنان ۋاقىت تاۋىپ ادامدارمەن سويلەسۋدىڭ ءوزى قيىن. نەگىزى جىگىتىم قازاقستاندىق بولعانىن قالايمىن.

— اڭگىمەڭە راحمەت!

اڭگىمەلەسكەن ەرمۇحامەد ماۋلەن

ماسكەۋ،

رەسەي فەدەراتسياسى