Artsport: Shymkentte sheneýnikke aıyppul salyndy

Shymkentte «Artsport» baǵdarlamasy boıynsha kásipkerlerdiń aldynda bereshektiń bolýyna jol bergen mádenıet basqarmasynyń basshysy jazalandy.

Shymkent qalasynyń prokýratýrasy qalalyq mádenıet basqarmasy tarapynan «Artsport» baǵdarlamasy aıasynda qyzmet kórsetken 159 kásipkerdiń 600 mln teńgeden asa bereshegi bar ekenin, ákimdik tarapynan ony óteýge shara qoldanbaı jatqanyn anyqtady.

Bul rette kásipkerlerge bereshekterdi qaıtarý týraly qala ákimdigine prokýrorlyq qadaǵalaý aktisi (zańdylyqty buzýshylyqty joıý týraly usynym) engizildi.

Prokýratýranyń aralasýynan keıin 159 kásipkerdiń 200 mln teńgege jýyq bereshegi ishinara tólendi. Qalǵan bereshekter jyl sońyna deıin qaıtarylatyn bolady.

Bereshekterdiń qalyptasýyna jol bergen qalalyq mádenıet basqarmasynyń basshysy Ákimshilik quqyq buzýshylyq týraly kodekstiń 234-1-babymen kináli dep tanylyp, oǵan osy bappen 306 300 teńge ákimshilik aıyppul salý jazasy qoldanyldy.

Dınara AMANTAI,

ASTANA