شەتەلدىڭ اتاقتى سپورتشىسى قازاقستاندا جاتتىعىپ جاتىر

فرانتسيانىڭ اتاقتى دزيۋدوشىسى، ءۇش مارتە وليمپيادا، 11 دۇركىن الەم جانە 5 رەت ەۋروپا چەمپيونى اتانعان تەددي رينەر قازاقستاندا جاتتىعىپ جاتىر.

قازاقستان دزيۋدو فەدەراتسياسىنىڭ حابارلاۋىنشا، ەلىمىزدىڭ ەرلەر جانە ايەلدەر ۇلتتىق قۇرامالارى جاڭا ماۋسىمعا دايىندىقتى باستادى.

قۇراما كوماندالار فرانتسيا دزيۋدو فەدەراتسياسىمەن بىرىگىپ، جىلدىڭ العاشقى وقۋ-جاتتىعۋ جيىندارىن الماتى قالاسى مەن الماتى وبلىسىندا وتكىزۋدە. بۇل جيىندا وتانداستارىمىز فرانتسيالىق سپورتشىلارمەن شەبەرلىگىن شىڭداپ، تاجىريبە الماسۋدا.

الماتى قالاسىنداعى دزيۋدو اكادەمياسىندا اۋىر سالماقتاعى تاتامي شەبەرلەرى جاتتىعۋدا. ال الماتى وبلىسىنداعى «جاڭاشار» وليمپيادالىق دايارلاۋ ورتالىعىندا قالعان سالماقتاعى 100-گە جۋىق سپورتشى شەبەرلىگىن شىڭداۋدا.

وقۋ-جاتتىعۋ جيىنىنا 2022 جىلعى ەل چەمپيوناتىنىڭ قورىتىندىسى بويىنشا جاساقتالعان قۇراما دزيۋدوشىلارى شاقىرتۋ العان. مۇندا بالۋاندار قازاقستان ەرلەر جانە ايەلدەر قۇراماسىنىڭ باس باپكەرلەرى نۇربول سۇلەيمەنوۆ پەن ەرلان الپىسباەۆتىڭ، سونداي-اق فرانتسيالىق جاتتىقتىرۋشى-كەڭەسشىلەر كساۆە موندەنكس پەن ستەفان تراينونىڭ جەتەكشىلىگىمەن جاتتىعۋدا.

وقۋ-جاتتىعۋ جيىنى 22 قاڭتارعا دەيىن جالعاسادى.

داستان كەنجالين،

استانا