ەلىمىزدە فۋتبول مەنەدجمەنتى بويىنشا ءبىلىم بەرۋ باعدارلاماسى اشىلدى

الماتى قالاسىندا قازاقستان فۋتبول فەدەراتسياسى مەن Almaty Management University اراسىنداعى مەموراندۋم اياسىندا ءبىلىم بەرۋ باعدارلاماسىن ىسكە قوسۋعا بايلانىستى رەسمي ءىس-شارا ءوتتى. بۇل تۋرالى قازاقستان فۋتبول فەدەراتسياسى حابارلادى.

جوبانىڭ نەگىزى ماقساتى – فۋتبول يندۋسترياسىندا مەنەدجمەنتتىڭ بىلىكتىلىگى مەن كومپەتەنتسياسىن ارتتىرۋ.

ءىس-شارانىڭ اشىلۋ سالتاناتىندا قازاقستان فۋتبول فەدەراتسياسىنىڭ پرەزيدەنتى ادىلەت بارمەنقۇلوۆ، ۋەفا ۇلتتىق قاۋىمداستىقتاردى ستراتەگيالىق دامىتۋ دەپارتامەنتىنىڭ ديرەكتورى يليا كيتيچ جانە AlmaU ۋنيۆەرسيتەتىنىڭ رەكتورى گۇلنار كۇرەڭكەەۆا ءسوز سويلەدى.

قازاقستان فۋتبول فەدەراتسياسى ۋەفا قولداۋىمەن، AlmaU ۋنيۆەرسيتەتىمەن بىرلەسىپ، ءبىلىم بەرۋ باعدارلامالارىن ىسكە قوسادى. جىل سايىن مىڭنان اسا ماماندى دايارلاۋ قاجەت. قازىر ءبىزدىڭ ستراتەگيامىزدى جۇزەگە اسىراتىن مامانداردىڭ 30 پايىزى عانا بار. جاڭا مامانداردى دايىنداۋ مەن كوممۋنيكاتسيا جۇيەسىن ورناتۋعا باسا نازار اۋدارامىز. قىسقا مەرزىم ىشىندە جوبانى جۇزەگە اسىرۋ كەرەك. ءبىزدىڭ قولىمىزدان كەلەدى دەپ ويلايمىن، – دەپ اتاپ ءوتتى قفف پرەزيدەنتى ادىلەت بارمەنقۇلوۆ.

«فۋتبولدى ۇيىمداستىرۋدى باسقارۋ» تاقىرىبىنا ارنالعان العاشقى ءبىلىم بەرۋ باعدارلاماسى 27-29 ناۋرىز ارالىعىندا ءوتتى. «قايرات» فۋتبول كلۋبىنىڭ ت.س. سەگىزباەۆ اتىنداعى جاسوسپىرىمدەر اكادەمياسىندا ۇيىمداستىرىلعان ءبىلىم بەرۋ كۋرسىنا وتاندىق فۋتبول كلۋبتاردىڭ جەتەكشىلەرى قاتىستى.

ينتەنسيۆ باعدارلاماسىندا ءدارىس بەرۋ ءۇشىن AlmaU ۋنيۆەرسيتەتىنىڭ تاجىريبەلى ۇستازدارى شاقىرىلدى. ولار – ۆلاديمير ماتسوۆ، ەكاتەرينا ميليۋتينا جانە راسيما بايازيتوۆا. سونىمەن قاتار ءۇش كۇندىك ساباققا بريتانيالىق كوۆەنتري ۋنيۆەرسيتەتىنىڭ پروفەسسورى مايكل اناگنوستۋ ارنايى كەلدى.

كۋرس اياقتالعان سوڭ قاتىسۋشىلارعا قفف جانە AlmaU-دىڭ سەرتيفيكاتتارى مەن ارنايى بەلگىلەرى بەرىلدى.

ءبىلىم بەرۋ كۋرسىنان ەرنيس ەسماعامبەتوۆ، جاندوس احمەتوۆ، ارسلان بەسپاەۆ، ليۋبوۆ كراينوۆا، يگور پاۆليۋك، يۋري بوندارەنكو، عالىمجان كانيەۆ، احماد اميروۆ، اسىلبەك شاۋاليەۆ، فەدور سيمينيدي، ماقسات بايجانوۆ، سەرىكباي وتەگەنوۆ، الىبەك نۇرتاەۆ، سادىق مۇستافا، جانىبەك ورىمباەۆ، ۆلاديسلاۆ كازانكوۆ، ازامات ءاشىموۆ، باۋىرجان ءابدۋبايىتوۆ، مەلس قارامىسوۆ، ماناربەك ەرجانوۆ، ورالباي جاقسىمبەتوۆ ەسىمدى ازاماتتار ءوتتى.

كەلەسى ءبىلىم بەرۋ كۋرسى ءساۋىر ايىنىڭ سوڭىندا ونلاين فورماتتا وتەدى. بۇل باعدارلاما فۋتبولعا قىزىعۋشىلىق تانىتقان جانە  فۋتبول يندۋسترياسىن دامىتۋعا نيەت بىلدىرگەن ازاماتتارعا ارنالادى.

داستان كەنجالين،

استانا