زارينا دياس تەننيسكە قايتا ورالاتىنىن مالىمدەدى

تەننيسشى زارينا دياس كورتقا قايتا ورالاتىنىن مالىمدەدى. بۇل تۋرالى ول الەۋمەتتىك جەلىدەگى پاراقشاسىندا حابارلادى.

29 جاستاعى دياس سوڭعى رەت ءبىر جارىم جىل بۇرىن ەكى ماتچ قانا وتكىزدى.

ول Australian Open-2022 دوداسىندا العاشقى اينالىمدا وتانداسى ەلەنا رىباكيناعا ەسە جىبەردى. ال بىلتىر «رولان گارروس» ءتۋرنيرىنىڭ ىرىكتەۋ سايىسىندا ۇتىلىپ قالدى.

ۇزاققا سوزىلعان جاراقاتىنا بايلانىستى الەمنىڭ بۇرىنعى 31-راكەتكاسى كورتقا ورالا الماي جۇرگەن بولاتىن.

دوستار، بارىڭىزگە سالەم! مەن ەندى قايتا قالپىما كەلە جاتىرمىن.وزدەرىڭىز بىلەتىندەي، مەن يىعىمنان جاراقات العانمىن. ەندى ءبارى ويداعىداي بولىپ جاتىر. جاقسى ەمدەلىپ جاتىرمىن. حارد توسەنىشىندە اقش-تا وتەتىن جارىستارعا (شىلدەنىڭ اياعى) قوسىلامىن با دەپ وتىرمىن، — دەپ جازدى ول  Instagram پاراقشاسىندا.

زارينا دياس ەلىمىزدىڭ ءبىرىنشى راكەتكاسى بولعان.