قازاقستان دزيۋدوشىلارى ۋنيۆەرسيادانىڭ قولا جۇلدەگەرى اتاندى

وسى كۇندەرى قىتايدىڭ چەندۋ قالاسىندا ءوتىپ جاتقان دۇنيەجۇزىلىك ستۋدەنتتەر ويىندارىندا قازاقستان قۇراماسىنىڭ دزيۋدوشىلارى سۇڭعات جۇباتقان مەن اسقار نارقۇلوۆ قولا جۇلدەنى جەڭىپ الدى.

اۋەلى سۇڭعات جۇباتقان 66 كەلى سالماقتا كۇرەسىپ،  قازاقستان قۇراماسىنىڭ قورجىنىنا العاشقى جۇلدەنى سالدى. ول ءۇشىنشى ورىن ءۇشىن بەلدەسۋدە وزبەكستاندىق قارسىلاسىن تىزە بۇكتىرىپ، جەڭىسكە جەتتى.

ودان كەيىن كىلەمگە 73 كگ سالماق دارەجەسىندە شىققان  اسقار نارقۇلوۆ قازاقستان قۇراماسىنا ەكىنشى قولا مەدالدى سىيلادى.

نارقۇلوۆ ىرىكتەۋ كەزەڭدەرىنەن ىركىلمەي ءوتىپ، جارتىلاي فينالدىق جولدامانى ساراپقا سالاردا موڭعوليا سپورتشىسىنا ەسە جىبەردى. ال جۇبانىش بەلدەسۋىندە يتاليا سپورتشىسىنان باسىم ءتۇسىپ، قولا جۇلدە ءۇشىن كۇرەسۋگە مۇمكىندىك الدى. كىشى فينالدا ول قىرعىزستاندىق دزيۋدوشىدان باسىم ءتۇسىپ، جارىستىڭ قولا جۇلدەسىن جەڭىپ الدى.

قىتايدا ءوتىپ جاتقان ۋنيۆەرسيادا 8 تامىزعا دەيىن جالعاسادى.

داستان كەنجالين،

استانا