ماڭعىستاۋ وبلىسىندا فۋتبول ستاديونى مەن الاڭدارى سالىنادى

الداعى ۋاقىتتا ماڭعىستاۋ وبلىسىندا فۋتبول ساتديونى مەن الاڭدارى سالىنادى. بۇل تۋرالى قازاقستان فۋتبول فەدەراتسياسىنىڭ باسشىسى ادىلەت بارمەنقۇلوۆ پەن وبلىس اكىمى نۇرلان نوعاەۆ ايتتى.

كەزدەسۋدە قفف باسشىسى ەلىمىزدە سپورت ينفراقۇرىلىمىن جاقسارتۋ ءۇشىن ۋەفا-مەن بىرىگىپ، فۋتبول الاڭدارىن جاڭارتۋ باعدارلاماسىنىڭ جاسالعانىن،  ماڭعىستاۋ وبلىسىنداعى ەكى اۋىلدا فۋتبول الاڭدارىنىڭ قۇرىلىسى جوسپارلانعانىن اتاپ ءوتتى.

مەملەكەت باسشىسى قاسىم-جومارت توقاەۆتىڭ تاپسىرماسىنا سايكەس، وڭىرلەردە بۇقارالىق فۋتبولدى دامىتۋ — فەدەراتسيانىڭ العا قويعان باسىم مىندەتتەرىنىڭ ءبىرى. ءبىز ۋەفا-مەن بىرىگىپ، فۋتبول الاڭدارىن جاڭارتۋ باعدارلاماسى جاسادىق. ول وڭىرلەردەگى فۋتبول ينفراقۇرىلىمىن جاقسارتۋعا ارنالعان. ءبىز فۋتبول الاڭدارىن سالىپ،  ميلليونداعان ادامنىڭ سۇيىكتى ويىنىن قول جەتىمدى ەتۋگە تىرىسامىز. ايماق باسشىلارىمەن بىرىگىپ، ۇلكەن جۇمىستى جوسپارلاپ وتىرمىز. سونىڭ ءبىرى — ماڭعىستاۋ وبلىسىنىڭ ەكى اۋىلىندا فۋتبول الاڭدارىن سالۋ.  بۇل جۇمىس جوسپاردا بار. «اۋىلدارداعى فۋتبول» باعدارلاماسى اياسىندا اۋىل جاستارى وزدەرىنىڭ فۋتبول ماشىقتارىن دامىتۋعا مۇمكىندىك الادى، – دەدى قفف باسشىسى.

سونىمەن بىرگە كەزدەسۋدە فۋتبول كلۋبتارىن ءتيىمدى باسقارۋ ماسەلەسى تالقىلاندى. وسى رەتتە، قفف باسشىسى اقتاۋدىڭ «كاسپي» فۋتبول كلۋبىن قازاقستان فۋتبول فەدەراتسياسىنىڭ باعدارلاماسىنا قاتىساتىن التى كلۋبتىڭ ءبىرى بولاتىنىن اتاپ ءوتتى.

بۇل باعدارلاما فۋتبول كلۋبتارىن باسقارۋداعى كاسىبيلىك دەڭگەيىن ارتتىرۋعا ارنالعان، – دەدى ادىلەت بارمەنقۇلوۆ.

كەزدەسۋدە ماڭعىستاۋ وبلىسىنىڭ اكىمى نۇرلان نوعاەۆ بۇقارالىق سپورتتى بەلسەندى تۇردە ناسيحاتتاۋ جانە ءتيىستى ينفراقۇرىلىمدى دامىتۋ – وزەكتى ماسەلە ەكەنىن ايتتى. وسى ورايدا، وبلىس اكىمى وڭىردە سپورت نىساندارىن كوبەيتۋ جانە قولدانىستاعى نىسانداردى جاڭعىرتۋ بويىنشا جۇيەلى جۇمىس جۇرگىزىلىپ جاتقانىن،  «جاس قانات» ستاديونىندا جابىندى اۋىستىرۋعا قاراجات بولىنگەنىن، سونداي-اق، 4 شاعىناۋدانداعى «كاسپي» فۋتبول كلۋبىنىڭ سپورت كەشەنىنىڭ جانىندا ستاديون سالۋ بويىنشا جوبا ازىرلەنگەنىن اتاپ كورسەتتى.

ونىڭ ايتۋىنشا، الداعى ۋاقىتتا قازاقستان فۋتبول فەدەراتسياسى ەكى اۋىلعا فۋتبول الاڭدارىن سالىپ بەرسە، اكىمدىكتىڭ قولداۋىمەن اقتاۋداعى «كاسپي» فۋتبول كلۋبىنىڭ سپورت كەشەنىنىڭ جانىنان ستاديون سالىنادى.

قازاقستان فۋتبول فەدەراتسياسى

فوتو: قازاقستان فۋتبول فەدەراتسياسى