Ешкімнен жеңілмеген боксшы Жәнібек Әлімханұлын жекпе-жекке шақырды (ВИДЕО)

Ұлыбританиялық кәсіпқой боксшы Феликс Кэш Жәнібек Әлімханұлын жекпе-жекке шақырды.  24.kz телеарнасының хабарлауынша, Феликс Кэш бүгінге дейін 16 рет қолғап түйістіріп, соның бәрінде жеңіске жеткен. 10 жекпе-жекті уақытынан бұрын аяқтаған. Соның арқасында ол WBO рейтингінде төртінші орынға көтерілген.

«Қазақ стайл» (Әлімханұлының лақап аты, — ред.) кел айқасайық. Жұдырықтасатын ешкім жоқ деп әлі айтып жүрсің ғой. Менімен айқаста саудаң бітеді, — деді ол Twitter желісінде.

Жәнібек Әлімханұлы дәл осы тұжырым бойынша чемпиондық белдіктің иегері.

Қазақ боксшысының кәсіпқой бокстағы көрсеткіші де өте жақсы. Ол 14 рет жекпе-жекке шығып, соның бәрінде қарсыласын жеңген.

Жәнібек Әлімханұлы  соңғы рет биыл мамыр айында шаршы алаңға шықты. Сол кезде ол АҚШ-та ұйымдастырылған бокс кешінде канадалық Стивен Батлерді ұтып, WBO тұжырымы бойынша әлем чемпионы атағын қорғап қалды. Ал Феликс Кэш соңғы рет былтыр желтоқсанда рингке шыққан. Ол Англияның Лидс қаласында португалиялық Келсо Невешамен кездесіп, төрешілер шешімімен жеңіске жеткен.